16 հոկտեմբեր, 2020 21:47

Նիկոլ Փաշինյանը մասնակցել է պատերազմում զոհված Մարատ Մանուկյանի հոգեհանգստին

Վարչապետ Նիկոլ Փաշինյանը հոկտեմբերի 16-ին մասնակցել է Արցախում ռազմական գործողությունների հետևանքով զոհված Մարատ Մանուկյանի հոգեհանգստին։

«Այսօր մասնակցեցի զոհված զինվորի՝ շարքային Մարատ Մանուկյանի հոգեհանգստին:

Ցավակցեցի, ապա լսեցի նրա ծնողներին, առանձին զրույց ունեցա նրա հոր հետ, եւ այդ զրույցից հասկացա՝ ճիշտ եմ ընկալում մեր ժողովրդի մղումներն ու ցանկությունները այն մասին, թե ինչ պիտի անենք այս իրավիճակում միասին, ազգովի:

Պետք է տեր կանգնենք մեր իրավունքին, մեր հայրենիքին, մեր պետությանը: Ու մեր նահատակների հեղած արյանը: Այլ տարբերակ չկա: Խնամենք, ուժեղացնենք մեր կամքը հաղթանակի»,- գրել է Փաշինյանը ֆեյսբուքի իր էջում: