20 հոկտեմբեր, 2020 20:41

Հոկտեմբերի 21-ին Իրանում կմեկնարկի ՀՕՊ ուժերի «Վիլայաթի երկնքի պաշտպաններ» զորավարժությունը․ ParsToday

Իրանի հակաօդային պաշտպանության զորակայանի օպերատիվ ղեկավարմամբ ու առաջնորդությամբ, բանակի և Իսլամական հեղափոխության պահապանների կորպուսի մասնակցությամբ, հոկտեմբերի 21-ին կմեկնարկի «Վիլայաթի երկնքի պաշտպանների հակաօդային պաշտպանություն-99» զորավարժությունը․ այս մասին հաղորդում է ParsToday-ը։

Զորավարժության հրամանատար բրիգադային գեներալ Ղադեր Ռահիմզադեն ասել է. «Մարտական պատրաստվածությունը բարելավելու և  Իրանի զինված ուժերի հակաօդային պաշտպանության հնարավորությունները մեծացնելու նպատակով,  զորավարժությունը կանցկացվի բանակի ՀՕՊ ստորաբաժանումների, ավիատիեզերական ուժերի և օդուժի մասնակցությամբ, Իրանի հակաօդային պաշտպանության զորակայանի օպերատիվ ղեկավարմամբ ու առաջնորդությամբ»:

Զորավարժությունն ընդգրկելու է երկրի տարածքի կեսը:

Զորավարժության հրամանատարը հավելել է. «Զորավարժություններում կօգտագործվեն սեփական արտադրության տարատեսակ  հրթիռային համակարգեր, ռադարներ, հետախուզական տեղեկատվություններ, էլեկտրոնային պատերազմ, կապի համակարգեր և բանակի ու ԻՀՊԿ-ի տեսողական հսկողության ցանցը»:

«Զորավարժությունների ընթացքում առաջին անգամ կկիրառվի ամբողջապես տեղական արտադրության  սարքավորումների և զենքի նոր սերունդ և  Իրանի հակաօդային պաշտպանության նոր մարտավարությունը»,- ասել է բրիգադային գեներալ Ռահիմզադեն: