Կորոնավիրուսի դեմ պատվաստանյութ արտադրող ամերիկյան «Մոդեռնա» ընկերության առաջին փուլի փորձարկումների արդյունքները ցույց են տալիս, որ պատվաստանյութն անվտանգ է և առաջացնում է իմունային պատասխան, հաղորդում է Reuters գործակալությունը։ («Մոդեռնա» ընկերության հիմնադիրը Նուբար Աֆեյանն է)։
«Մոդեռնա»-ի՝ կորոնավիրուսի դեմ փորձնական պատվաստանյութը անվտանգ է և առաջացրել է իմունային պատասխան բոլոր 45 առողջ կամավորների շրջանում` ըստ ներկայում ընթացող ուսումնասիրության վաղ փուլի արդյունքների, հայտնում են ԱՄՆ հետազոտողները։
Կամավորները, որոնք ստացել են պատվաստանյութի երկու չափաբաժին, ձեռք են բերել վիրուսը սպանող հակամարմինների ավելի բարձր մակարդակ, քան կորոնավիրուսով վարակված և առողջացած անձանց միջին ցուցանիշն է։ Այս մասին հայտնել է թիմը՝ New England Journal of Medicine գիտական հանդեսում։
Ուսումնասիրության կամավորներից ոչ մեկի մոտ չի նկատվել կողմնակի լուրջ ազդեցություն, իսկ կեսից ավելին հայտնել է մեղմ կամ չափավոր ռեակցիաների՝ հոգնածության, գլխացավի, մկանացավի կամ ներարկման տեղում ցավի մասին: Սրանք ավելի մեծ հավանականությամբ տեղի են ունեցել երկրորդ դեղաչափից (դոզա) հետո և այն մարդկանց մոտ, որոնք ստացել են առավելագույն դեղաչափը:
Մասնագետների կարծիքով, պատվաստանյութն անհրաժեշտ է՝ վերջ դնելու կորոնավիրուսային համավարակին, որը մինչ այժմ ամբողջ աշխարհում մոտ 575 000 մահվան պատճառ է դարձել և վարակել միլիոնավոր մարդկանց։
Մոդեռնան» առաջինն էր, որ վիրուսի գենետիկական հաջորդականության վերաբերյալ հրապարակումից 66 օր հետո՝ մարտի 16-ին, սկսեց պատվաստանյութի փորձարկումները մարդկանց շրջանում:
«Եթե պատվաստանյութը կարող է առաջացնել իմունային պատասխան, որը համեմատելի է բնական վարակի առաջացրածի հետ, ապա այն հաղթող պատվաստանյութ է,- ասել է ԱՄՆ ալերգիկ և վարակիչ հիվանդությունների ազգային ինստիտուտի տնօրեն, դոկտոր Էնթոնի Ֆաուչին։- Ահա թե ինչու մենք շատ գոհ ենք արդյունքներից»:
Երեքշաբթի «Մոդեռնա»-ի բաժնետոմսերի գինն աճել է ավելի քան 15 տոկոսով:
ԱՄՆ կառավարությունը աջակցում է «Մոդեռնա»-ի պատվաստանյութին և տրամադրել է գրեթե կես միլիարդ դոլար, և այն ընտրել է որպես առաջիններից մեկը, որը կանցնի լայնամասշտաբ փորձարկումների փուլ։
Հունիսին «Մոդեռնան» հայտնել էր, որ իր վերջնական փուլի ուսումնասիրության համար ընտրել է պատվաստանյութի 100 միկրոոգրամ չափաբաժին՝ կողմնակի ազդեցությունը նվազագույնի հասցնելու համար:
Այդ չափաբաժնով, ըստ «Մոդեռնա»-ի, այն կարող է տարեկան 500 միլիոն դեղաչափ մատակարարել և, հավանաբար, սկսած 2021 թվականից՝ հասցնել տարեկան մինչև 1 միլիարդի։
Ապրիլին «Մոդեռնա»-ն ընդլայնել էր առաջին փուլի փորձարկումները` ընդգրկելով 55-ից բարձր տարիքի մեծահասակների, որոնք ռիսկային խմբում են: «Մոդեռնա»-ն մեկ տարվա ընթացքում վերահսկողության տակ կպահի կամավորներին՝ կողմնակի բարդություններ փնտրելու, ինչպես նաև իմունիտետի տևողությունը ստուգելու համար։
Ընկերությունը փորձարկումների 2-րդ փուլը սկսել էր մայիսին, և ակնկալում է անցնել երրորդ փուլին արդեն հուլիսի 27-ին:
Առաջին փուլի փորձարկումները նպատակ ունեն ապահովել պատվաստանյութի անվտանգությունը և որոշել արդյունավետ դեղաչափը։ Երկրորդ փուլի փորձարկումները, ընդգրկելով ավելի մեծաթիվ կամավորների, կարող են նախնական տվյալներ հաղորդել պատվաստանյութի արդյունավետության մասին։
Երրորդ փուլի փորձարկումներն անցկացվում են կամավորների առավել մեծաթիվ խմբերում` արդյունավետությունը հաստատելու և հազվադեպ կողմնակի բարդությունները հայտնաբերելու համար: Երրորդ փուլի փորձարկումը կանցկացվի 30 000 կամավորների շրջանում:
Զառա Պողոսյան
Թեմայի շուրջ՝ ավելին․
Կորոնավիրուսային պատվաստանյութը մշակվում է արագացված ռեժիմով. աշխատում է 150 հետազոտական խումբ
Կորոնավիրուսի դեմ պատվաստանյութի փորձարկման առաջին արդյունքները դրական են
Moderna-ն թեկնածու պատվաստանյութի՝ ԱՄՆ-ից դուրս մատակարարման համաձայնագիր է կնքել
