58 000 մարդ առցանց խնդրագիր Է ստորագրել՝ կոչ անելով «Լիբանանը հաջորդ 10 տարվա համար ֆրանսիական մանդատին հանձնել»։ Խնդրագրին միացողների թիվը րագ ավելանում է։
Խնդրագիրը Ֆրանսիային կոչ է անում վերահսկողության տակ վերցնել Լիբանանը Բեյրութում տեղի ունեցած մահաբեր պայթյունից հետո։ Քննադատներն ասում են, որ պատճառը Լիբանանի կառավարության կոռումպացվածությունն ու վատ կառավարումն է։
Խնդրգաիրը չորեքշաբթի Avaaz կայքում հրապարակել են Լիբանանի քաղաքացիները ՝ Բեյրութը ցնցած պայթյունից հետո։ Պայթյունի հետևանքով սպանվել է ավելի 140, վիրավորվել` ավելի քան 5000 մարդ։
«Լիբանանի պաշտոնյաները հստակ ցույց տվեցին երկրի անվտանգությունն ու կառավարումն ապահովելու լիակատար անկարողությունը»,- ասվում է խնդրագրում: «Փլուզվող համակարգով, կոռուպցիայով, ահաբեկչությամբ և ռազմական խմբավորումներով երկիրը փչում է իր վերջին շունչը»։
«Մենք կարծում ենք, որ Լիբանանը պետք է վերադառնա ֆրանսիական մանդատի տակ, որպեսզի հաստատվի մաքուր և ամուր կառավարում»։
Լիբանանցիները հուսահատ են
«Դոյչե Վելլե»-ի արաբական բաժնից Դիմա Թարխինին ասել է, որ խնդրագիրը լայնորեն տարածվել է լիբանանյան սոցիալական ցանցերում: «Ահա թե ինչքան հուսահատ են որոշ լիբանանցիներ»,- ասել է նա:
«Շատ բան է կորսվել մի տեղում, որտեղ արդեն իսկ քիչ բան կար։ Նրանք կորցրել են իրենց տները, ունեցվածքը, չեն կարողանում փրկել իրենց երեխաներին, չգիտեն՝ ինչ անել»։
Ֆրանսիան Առաջին աշխարհամարտից հետո՝ 1920-1945 թթ., ստանձնել էր Սիրիայի և Լիբանանի մանդատը։
Մակրոնը՝ Բեյրութում
Խնդրագիրն ուղարկվել է Ֆրանսիայի նախագահ Էմանուել Մակրոնին։ Նա առաջին օտարերկրյա առաջնորդն էր, որ ողբերգությունից հետո ժամանեց Բեյրութ:
Մակրոնը ժամանելուն պես զգուշացրել է, որ առանց բարեփոխումների Լիբանանը «շարունակելու է խորտակվել»։ Նա խոստացել է, որ Ֆրանսիան կօգնի համախմբել օգնությունը քաղաքի համար, որը միլիարդավոր դոլարների վնաս է կրել և ավերվել:
Բեյրութի կենտրոնում հավաքված զայրացած բազմությանը նա ասել է, որ քաղաքական իշխանությունների հետ նոր համաձայնության է հասնելու։
«Ես երաշխավորում եմ, որ օգնությունը կոռումպացված ձեռքերում չի հայտնվի»,- ասել է Մակրոնը:
«Ես կխոսեմ քաղաքական բոլոր ուժերի հետ, որպեսզի նրանց խնդրեմ նոր պակտի հասնել։ Ես այստեղ եմ այսօր, որ նրանց առաջարկեմ քաղաքական նոր պակտ»,- ասել է նա։
Բեյրութի փողոցներում ցուցարարների բազմությունը Մակրոնին կոչ է արել օգնել տապալել երկրի ղեկավարությանը։ Քաղաքում շոկն արագ վերաճել էր զայրույթի, և շատ մեկնաբաններ ու ցուցարարներ ասում էին, որ կոռուպցիան և քաղաքական դասերի ոչ կոմպետենտությունն էին պատասխանատու մահացու պայթյունի համար:
Ֆրանսիայի դատախազությունը պայթյունի փաստով հետաքննություն է սկսել։ Ֆրանսիայի առնվազն 21 քաղաքացի վիրավորվել է, մեկը՝ զոհվել պայթյունի հետևանքով։
Նույնիսկ նախքան կորոնավիրուսի համավարակը, Լիբանանը ցնցվել էր կառավարության ու տնտեսության պատճառով զայրացած քաղաքացիների բողոքի ցույցերից։ Վերջերս արժույթի արժեզրկումը հանգեցրել է շատ լիբանանցիների հազարավոր դոլարների խնայողությունների կորստին։
Սաթենիկ Հակոբյան
