Օգոստոսի 16-ին հեռախոսազրույց է տեղի ունեցել Ռուսաստանի և Բելառուսի նախագահներ Վլադիմիր Պուտինի և Ալեքսանդր Լուկաշնեկոյի միջև:
Ըստ Կրեմլի կայքի՝ քննարկվել է Բելառուսում տիրող իրավիճակը, որն ստեղծվել է այդ երկրում նախագահական ընտրություններից հետո՝ հաշվի առնելով «դրսից հանրապետության վրա գործադրվող ճնշումը»։
«Ռուսաստանյան կողմը վերահաստատել է պատրաստակամությունը՝ ցուցաբերելու անհրաժեշտ օգնություն՝ Միութենական պետության ստեղծման մասին պայմանագրի սկզբունքների հիման վրա, ինչպես նաև անհրաժեշտության դեպքում՝ Հավաքական անվտանգության պայմանագրի կազմակերպության գծով»,- ասված է Կրեմլի հաղորդագրությունում։
Օգոստոսի 15-ին Լուկաշենկոյի և Պուտինի միջև տեղի էր ունեցել ևս մեկ հեռախոսազրույց։
Օգոստոսի 16-ին՝ Բելառուսում նախագահական ընտրություններից 8 օր անց, շարունակվել են բազմահազարանոց բողոքի ցույցերը։
Բելառուսի նորագույն պատմության ամենազանգվածային ցույցին՝ Լուկաշենկոյի հրաժարականի պահանջով, տարբեր հաշվարկներով մասնակցել է 200-350 հազար մարդ։ Նույն օրը տեղի է ունեցել նաև ցույց՝ ի աջակցություն Լուկաշենկոյի, որի ընթացքում վերջինս հայտարարել է, որ ոչ ոքի չի հանձնի Բելառուսը։
