Սեպտեմբերի 3-8-ն ընկած ժամանակահատվածում իրականացվել է ուսումնական հաստատությունների անձնակազմի շրջանում 5 917 թեստավորում, որից 56-ի մոտ հայտնաբերվել է կորոնավիրուսային հիվանդություն։ Այս մասին ՍիվիլՆեթին հայտնեց առողջապահության նախարարության խոսնակ Ալինա Նիկողոսյանը։
Նիկողոսյանի փոխանցմամբ՝ կատարվել է այդ անձանց մանրամասն համաճարակաբանական հետազոտություն, պարզվել է վերջիններիս հետ սերտ շփված անձանց շրջանակը։ Դրական դեպքերը և կոնտակտավորները մեկուսացվել են 14 օրով։ Առողջության առաջնային պահպանման կենտրոնի (ԱԱՊԿ) կողմից 14 օրվա ընթացքում իրականացվելու է առողջական վիճակի ամենօրյա հսկողություն։
Նիկողոսյանը նշեց նաև, որ կորոնավիրուս ախտորոշող հայկական արտադրության թեստերն արդեն կիրառվում են։ Հիվանդությունների վերահսկման և կանխարգելման ազգային կենտրոնը փոձարկել է դրանք, թեստերը համապատասխանում են բոլոր չափորոշիչներին։
Սեպտեմբերի 11-ի ժամը 11:00-ի դրությամբ՝ Հայաստանում հաստատվել է կորոնավիրուսի 177 նոր դեպք, ապաքինվել է 201 մարդ, մահացել է 3 մարդ։ Կատարված 3 450 թեստերից դրական է 5 տոկոսը։
***
Հայկական արտադրության ՊՇՌ թեստերը, որոնք նախատեսված են կորոնավիրուսի հաստատման համար, արդեն պատրաստ են։ Մոլեկուլյար կենսաբանության ինստիտուտը կարող է օրական մոտ 2 000 թեստ արտադրել։ ՍիվիլՆեթն այցելել է ինստիտուտ՝ ծանոթանալու թեստերի արտադրության գործընթացին և պարզելու, թե ինչ հեռանկարներ կան դրանց հետ կապված:
Լուսինե Վարդանյան
