Վրաստանում կորոնավիրուսը նոր թափ է ստացել, և չնայած համաճարակաբանների ջանքերին՝ վարակի աշխարհագրությունն աստիճանաբար ընդլայնվում է։
Սեպտեմբերի 15-ի դրությամբ՝ երկրում կորոնավիրուսի 170 նոր դեպք է հաստատվել, որոնցից մեծ մասը՝ Աջարիայում։ Այս մասին լրագրողներին հայտնել է Թբիլիսիի ինֆեկցիոն հիվանդանոցի տնօրեն Մարինա Էզուգբայան։
Բաթումիում վերջին օրվա ընթացքում գրանցվել է 124 նոր դեպք, Թբիլիսիում՝ 20, Քութայիսիում՝ 13։
Մեկ օրվա ընթացքում Վրաստանում կորոնավիրուսից առողջացել է 12 մարդ։ Այս պահին կորոնավիրուսից բուժող կենտրոններում 1 154 պացիենտ կա։ Նրանցից հինգի վիճակը ծայրահեղ ծանր է, 35-ինը՝ ծանր։
Էզուգբայայի խոսքով՝ այս թվերը հավանաբար կփոխվեն, քանի որ վարակակիրների թվի աճի հետ մեկտեղ աճում է ինչպես թեթև, այնպես էլ ասիմպտոմ և ծանր դեպքերի թիվը։
Թբիլիսիի ինֆեկցիոն հիվանդանոցում 33 վարակված կա, որոնցից մեկի վիճակը ծայրահեղ ծանր է, իսկ երեքինը ծանր։
StopCov պաշտոնական կայքի տվյալներով՝ երկրում վարակվածների ընդհանուր թիվը 2 562 է, առողջացել է 1 381 մարդ, մահացել 19-ը։ Վրաստանում կորոնավիրուսի առաջին դեպքը գրանցվել էր փետրվարի 26-ին։
Ավելի վաղ Վրաստանի վարչապետ Գիորգի Գախարիան հայտարարել էր, որ երկրում սկսվել է կորոնավիրուսի երկրորդ ալիքը և հայտնել կանխարգելիչ միջոցառումների խստացման մասին։
Լուսինե Վարդանյան
