Արայիկ Հարությունյանը հանդիպել է ՌԴ Պետական դումայի պատգամավոր Վիտալի Միլոնովին

Արցախի նախագահ Արայիկ Հարությունյանը հոկտեմբերի 16-ին ընդունել է ՌԴ Պետական դումայի «Միասնական Ռուսաստան» (Единая Россия) խմբակցության անդամ Վիտալի Միլոնովին։

«Քննարկել ենք ադրբեջանա-թուրքա-ահաբեկչական ագրեսիայի հետևանքով տարածաշրջանում ստեղծված իրավիճակը։ Երկուստեք ընդգծել ենք տարածաշրջանի կայունությունը խաթարող գործողությունների և արտաքին ու ահաբեկչական ուժերի ընդգրկման անթույլատրելիությունը: Ծավալված առանձնազրույցում ես իմ շնորհակալությունն եմ հայտնել պարոն Միլոնովին այցի և ցուցաբերած հետաքրքրության համար, ինչպես նաև ընդգծել եմ Ռուսաստանի Դաշնության ունեցած կարևոր դերակատարությունը՝ հակամարտության կարգավորման և երկարատև խաղաղության հաստատման գործում»,- գրել է Հարությունյանը ֆեյսբուքի իր էջում։

Известия թերթի թղթակցին Միլոնովն ասել է, որ Լեռնային Ղարաբաղ է եկել՝ աջակցելու Լեռնային Ղարաբաղի խորհրդարանի գործընկերներին։ Նա նշել է նաև, որ ներկայիս սրումը պայմանավորված է առանձին մարդկանց աշխարհաքաղաքական հավակնություններով։