Civilnet
Ադրբեջանի զինուժը արցախա-ադրբեջանական շփման գծի ողջ երկայնքով շարունակել է հարձակողական գործողությունները, մարտական գործողություններ են ընթացել կոնկրետ բնակավայրերի ուղղությամբ։ Միասնական տեղեկատվական կենտրոնում այս մասին հայտնեց ՊՆ ներկայացուցիչ Արծրուն Հովհաննիսյանը։
«Օջախային մարտերը իրենցից ներկայացնում են փոքր դիվերսիոն խմբերի ներթափանցումներ հանգուցային կետեր»,- հայտարարեց նա։ Հարավային ուղղությամբ, որտեղ տևական ժամանակ է՝ թեժ մարտեր են, Ադրբեջանը փորձել է առաջխաղացում ապահովել. «Գրեթե բոլոր առաջխաղացումները հետ են մղվել՝ պատճառելով մեծ կորուստներ, այդ թվում՝ զրահատեխնիկայի։ Հիմնականում մարտերն ընթանում են հրետանային համազարկային համակարգով»,- շեշտեց Հովհաննիսյանը։ Մեկնաբանելով ՌԴ նախագահ Վլադիմիր Պուտինի այսօրվա հայտարարությունն այն մասին, որ պատերազմի մեկնարկից ի վեր երկու կողմերն ունեն մոտ 5 000 զոհ, Արծրուն Հովհաննիսյանն ասաց. «Ընդհանրացված թվեր են ասվել ՌԴ նախագահի կողմից և պարզ չէ՞ր, որ չէր կարող կոնկրետ թիվ ասվել։ Միանշանակ հակառակորդը ունի մեր զոհերի համեմատ շատ զոհեր, դա բացարձակ ճշմարտություն է ու քննարկումից դուրս»։
ՊՆ ներկայացուցիչը այսօր ևս տեղեկացրեց՝ մերձռազմաճակատային որոշ հատվածներով հակառակորդի դիվերսանտները ներթափանցումներ են իրականացնում, փորձում խուճապ տարածել տներ այրելու և այլ գործողությունների միջոցով, սակայն գրագետ հակահարվածից հետո անկանոն փախչում են։
Պատմություններ
