Civilnet
Հոկտեմբերի 23-ին Մարտակերտ և Բերձոր քաղաքներն իրենց հարակից բնակավայրերով հրթիռակոծվել են։ Միասնական տեղեկատվական կենտրոնում այդ մասին ասաց ՊՆ ներկայացուցիչ Արծրուն Հովհաննիսյանը։
Նա տեղեկացրեց՝ Արցախի կենտրոնից հարավ ընկած Շեխեր և Ջիվանի բնակավայրերի ուղղությամբ ադրբեջանական հրոսակներից բաղկացած դիվերսիոն-հետախուզական խումբը ներթափանցման փորձեր է իրականացրել. «Տեղի են ունեցել ադրբեջանական դիվերսիոն խմբերի չեզոքացման գործողություններ։ Գրեթե լիովին մաքրվել է Շեխեր բնակավայրը իր հարակից անտառներով, չեզոքացման աշխատանքները շարունակվում են»:
Հարավային ուղղությամբ, ըստ ՊՆ ներկայացուցչի, գրոհներ են փորձել իրականացնել Որոտանի ուղղությամբ, սակայն դրանք հետ են մղվել, իսկ որոշ ստորաբաժանումներ կազմալուծվել են, դիմել փախուստի, փորձել են պատսպարվել մոտակա ձորակներում։
Խոսելով մարտական գործողությունների ներկա վիճակի մասին, Հովհաննիսյանը նշեց. «Հստակ բնագծեր չկան, մարտերը օջախային են, կարևոր հանգույցների շուրջ փորձում են հարձակում իրականացնել»։
ՊՆ ներկայացուցիչը շեշտեց՝ կրակի խտությունը էականորեն նվազել է. սա բացատրվում է այն հանգամանքով, որ կողմերը էական կորուստներ են կրել, և առաջին օրերի կրակի խտության թափը չկա։ «Առանձին տեղերում կատաղի հարձակումների ժամանակ երբեմն կարճաժամկետ խտությունը բարձրանում է»,- ասաց նա՝ ավելացնելով, որ առաջիկա օրերին հայկական կողմը քարտեզային ձևով ներկայացնելու է ռազմադաշտում առկա իրավիճակը։
Պատմություններ
