Դեկտեմբերի 9-ին տեղի ունեցավ ընդդիմադիր ուժերի հանրահավաքը խորհրդարանի շենքի դիմաց։ Ազգային ժողովում այդ ընթացքում ԱԺ-կառավարություն հարցուպատասխանն էր ընթանում։ Հանրահավաքի ընթացքում ելույթ ունեցավ «Հայրենիքի փրկության շարժման» միասնական թեկնածու Վազգեն Մանուկյանը: Նրա ելույթը՝ ստորև:
«Սիրելի՛ ժողովուրդ,
Մեր պայքարը քաղաքական պայքար չէ, մեր պայքարն իշխանագողության պայքար չէ. սա ազգային պայքար է: Մենք ազգային պայքար մղել ենք 200 տարի առաջ և 1000 տարի առաջ: Նո՛ւյնն է: Օտարի միջոցով կոտորվել է մեր ամբողջ պետությունը: Այն, ինչ արվեց Արցախի հետ, շարունակելու են անել Հայաստանի հետ: Մենք համարվում էինք տարածաշրջանում ամենահզոր բանակ ունեցող պետությունը: Երկուսուկես տարում այդ ամեն ինչը ոչնչացավ:
Այս նույն հարթակից ես եղել եմ այն առաջնորդներից, որ տարել են ձեզ հաղթանակի, և մենք ունեցել ենք անկախ պետություն, ղեկավարել եմ բանակը, մենք գնացել և հաղթել ենք: Այժմ նույնպես ասում եմ ձեզ՝ գնանք, միասին կհաղթենք: Սա երկար տևել չի կարող, ինչքան տևի, այնքան ավելի կործանում է մեր Հայաստանի համար:
Հիմա մենք ծնկի իջած ողորմություն ենք խնդրում այս ու այն երկրից: Նորից ոտքի կանգնենք, գնանք առաջ, առջևում ես տեսնում եմ՝ մենք ոնց ենք նորից դառնալու հզոր պետություն, արդար պետություն` բավարարող իր քաղաքացիներին:
Բոլորս միասին՝ դեպի հաղթանակ»:
