Civilnet
Խծաբերդ-Հին Թաղեր հատվածում դեռևս շարունակում է անհայտ մնալ 73 մարդու ճակատագիր: Այս մասին հայտարարել է ՊԲ-ն հերքելով լուրերը, թե իբր մինչև 171 հայ զինծառայող է անհետ կորել այդ տարածքում։
«Միջադեպի առաջին իսկ ժամերից, ռուս խաղաղապահների աջակցությամբ, տարվում են անհետաձգելի աշխատանքներ մեր զինծառայողների ճակատագրերը հնարավորինս արագ պարզելու ուղղությամբ: Հավելենք, որ խնդիրը տեղում ուսումնասիրելու և անհրաժեշտ գործողություններ ձեռնարկելու նպատակով Արցախի Հանրապետություն է մեկնել նաև ՀՀ ԶՈՒ ԳՇ պետ, գեներալ-գնդապետ ՕնիկԳասպարյանը։
Հանրությանը պարբերաբար տեղեկատվություն կտրամադրվի իրականացվող քայլերի և դրանց արդյունքների վերաբերյալ»,- հայտնել են ՊԲ-ից։
Ի դեպ, խնդիրը հանրային դարձավ երեկ երեկոյան, երբ համացանցում հայտնվեցին ադրբեջանական տեսանյութերն ու հանրային լայն արձագանք ստացան։ Դրանից հետո ՀՀ ՊՆ-ն դիմեց Արցախի ՊԲ-ին՝ պարզաբանում պահանջելով։ Այսօր առավոտյան միայն ՊԲ-ն որոշ տեղեկություն հաղորդեց այդ մասին։ Մինչ այդ տեսանյութերի հանրայնացումը, ՊԲ-ն պահպանում էր լռություն։
Միջադեպի առնչությամբ այօսր հայտարարություն տարածեց Արցախի ՄԻՊ Արտակ Բեգլարյանը՝ բացարձակ անընդունելի համարելով այն և կոչ անելով իրավապահներին արագորեն ու խստորեն քննել միջադեպը՝ պարզելու համար բոլոր հանգամանքներն ու մեղավորների շրջանակը:
«ԱՀ և ՀՀ բոլոր լիազոր մարմինները պարտավոր են անհապաղ քայլեր ձեռնարկել մեր բոլոր ռազմագերիներին րոպե առաջ տուն վերադարձնելու ուղղությամբ: Դրանից բացի, անհրաժեշտ է հստակ տեղեկություններ տրամադրել ռազմագերիների հարազատներին և վարել հնարավորինս թափանցիկ հանրային հաղորդակցություն՝ խուսափելու համար ապատեղեկատվություններից ու ավելորդ լարվածություններից»,- հայտարարել էր Բեգլարյանը։
Պատմություններ
