Պաշտպանության նախարար Վաղարշակ Հարությունյանը Սյունիք հանդիպել է ՌԴ խաղաղապահ զորախմբի սպաների հետ, անդրադարձել Գորիս-Ստեփանակերտ ճանապարհի հսկողությանը, Հայաստանի՝ Ադրբեջանի հետ սահմանին ռուս սահմանապահների տեղակայման ծրագրին․ այս մասին ասված է ՊՆ հաղորդագրությունում։
«Սյունիքի մարզ կատարած այցի շրջանակում դեկտեմբերի 17-ին ՀՀ պաշտպանության նախարար Վաղարշակ Հարությունյանն աշխատանքային խորհրդակցություն է անցկացրել զորամիավորման հրամանատարի, Սյունիքի մարզպետի և ԱԱԾ սահմանապահ զորքերի տարածքային ստորաբաժանման հրամանատարի մասնակցությամբ:
Խորհրդակցության ընթացքում քննարկվել են Հայաստանի և Ադրբեջանի սահմանազատման, նոր ձևավորվող բնագծերում զինված ուժերի ստորաբաժանումների և սահմանապահ զորքերի տեղակայման հետ կապված հարցեր: Պաշտպանական գերատեսչության ղեկավարը հանձնարարականներ է տվել սահմանային բանակցություններին մասնակցող բարձրաստիճան սպաներին զորքերի տեղակայման, պահպանության տեղամասերի ստեղծման, ըստ ուղղությունների՝ նոր միավորների ձևավորման գործընթացի վերաբերյալ:
Զորամիավորման հրամանատարը և Սյունիքի մարզպետը ներկայացրել են վիճահարույց որոշ հատվածներում իրականացվող աշխատանքները, ընդգծել, որ կողմերի միջև սահմանային քննարկումները շարունակվում են:
Վաղարշակ Հարությունյանը հանդիպել է նաև ՌԴ խաղաղապահ զորախմբի սպաների հետ, անդրադարձել Գորիս-Ստեփանակերտ ճանապարհի հսկողությանը, Հայաստանի՝ Ադրբեջանի հետ սահմանին ռուս սահմանապահների տեղակայման ծրագրին, ինչպես նաև պատերազմի հետևանքով անհայտ կորած անձանց որոնողական աշխատանքներին և առաջիկա անելիքներին»,- ասված է հաղորդագրությունում։
***
44-օրյա պատերազմի հետևանքով Հայաստանի պետական սահամանն Ադրբեջանի հետ կտրուկ մեծացել է: Ադրբեջանը մոտեցել է Գեղարքունիքին և Սյունիքին:
Վարչապետ Նիկոլ Փաշինյանը տեսաուղերձում հայտարարել է, որ Ադրբեջանի հետ սահմանազատումը տեղի է ունենում «ոչ թե աչքաչափով, այլ GPS կոորդինատներով»։
Շատերն այս հայտարարությունը «խնդրահարույց» համարեցին՝ նշելով, որ ստեղծված իրավիճակում GPS կոորդինատներով սահամանազատում իրականացնելը կարող է վտանգավոր լինել սահմանամերձ բնակավայրերի բնակիչների համար: Այդ մասին խոսում են ոչ միայն փորձագետերը․ հայտարարությամբ է հանդես եկել նաև Հայաստանի մարդու իրավունքների պաշտպանը՝ նշելով, որ «GPS-ով սահմանազատումը լրջորեն վտանգում է սահմանային բնակավայրերի բնակիչների կյանքը»:
