Հայտնի են կառավարության շենքը զավթելու փորձի գործով ձերբակալված անձանց անունները

Կառավարության շենքը զավթելու փորձ կատարելու դեպքի առթիվ քննվող քրեական գործով ձերբակալված անձինք են Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։ Այս մասին ՍիվիլՆեթի հետ զրույցում ասաց Վահագն Չախալյանի և Տիգրան Չոբանյանի պաշտպան Միքայել Շխիմյանը։

Փաստաբանը հայտնեց, որ ձերբակալման դեմ բողոքներ է ներկայացվել դատարան։

Ավելի վաղ ՀՀ քննչական կոմիտեն տեղեկացրել էր, որ ՀՀ կառավարության շենքը զավթելու փորձ կատարելու կասկածանքով հինգ անձ է ձերբակալվել։

Հունվարի 28-ին ընդդիմությունը Հանրապետության հրապարակում հանրահավաք էր իրականացրել՝ իշխանության հրաժարականի և ժամանակավոր կառավարություն ձևավորելու պահանջով։ Հանրահավաքի ընթացքում բախում էր տեղի ունեցել ոստիկանների և քաղաքացիների միջև, 26 անձ բերման էր ենթարկվել։

Լուսանկարը՝ Ֆոտոլուրի։