Հունիսի 10-24-ը կանցկացվի ազգային նվագարանների և ժողովրդական երգի անհատ կատարողների հանրապետական 4-րդ մրցույթը` նվիրված Սայաթ-Նովայի ծննդյան 300-ամյակին:
Մրցույթի նախաձեռնողներն են` ՀՀ մշակույթի նախարարությունը, Հայաստանի երաժշտական ընկերությունը և Կոմիտասի անվան պետական կոնսերվատորիան:
Հանրապետական մրցույթին, որի նպատակն է բացահայտել ժողովրդական երաժշտարվեստի բնագավառում հանրապետության շնորհալի անհատ կատարողներին, աջակցել նրանց մասնագիտական զարգացմանը, կմասնակցեն երաժշտական ու արվեստի դպրոցների, քոլեջների, պետական կոնսերվատորիայի ուսանողներ, ասպիրանտներ, ինչպես նաև պրոֆեսիոնալ երաժիշտ-կատարողներ: Մասնակցության դիմումները կընդունվեն մինչև 2012 թ. հունիսի 1-ը:
Մրցույթը կանցկացվի երկու տարիքային խմբերում, երկու փուլով և չորս անվանակարգերում`ժողովրդական երգ, փողայիններ` շվի, սրինգ, դուդուկ, զուռնա, լարայիններ`թառ, քանոն, ուդ, քամանչա, բամբիռ և հարվածային գործիքներ:
Յուրաքանչյուր անվանակարգում մասնակիցները կներկայանան երեք կատարումով, որոնցից մեկը պարտադիր պիտի լինի Սայաթ-Նովայի ստեղծագործություններից:
Հաղթողները կստանան դիպլոմ և դրամական պարգև, որի չափսը դեռևս որոշված չէ: Բացի այդ` կլինեն նաև հատուկ մրցանակներ:
Մրցանակների և պատվոգրերի հանձնումը կկայանա գալա համերգի հանդիսավոր արարողության ժամանակ «Առնո Բաբաջանյան» համերգասրահում:
