ՀՀ վարչապետ Տիգրան Սարգսյանն ընդունել է Վենետիկի քաղաքապետ Ջորջիո Օրսոնիին, ով Հայաստան է այցելել առաջին անգամ` «Երևանը գրքի համաշխարհային մայրաքաղաք» միջոցառման շրջանակում:
«Ուրախ ենք ընդունելու Ձեզ, մանավանդ այն բանից հետո, երբ Վենետիկում երկու քաղաքների միջև համագործակցության համաձայնագիր ստորագրվեց: Կարծում եմ` դա նոր էջ է բացում մեր հարաբերություններում: Ցանկանում եմ Ձեզ հավաստիացնել, որ մենք դրանում խիստ շահագրգռված ենք: Կան բազմաթիվ ոլորտներ, որտեղ համագործակցության մեծ ներուժ ունենք, և կառավարությունը ջանքեր կգործադրի, որպեսզի այդ ներուժն իրացվի», – նշել է ՀՀ կառավարության ղեկավարը:
Ինչպես տեղեկացնում է կառավարության մամուլի ծառայությունը, Վենետիկի քաղաքապետը նշել է, որ քույր-քաղաքներ դառնալու առաջնային նպատակներից է տնտեսական և մշակութային հարաբերությունների զարգացումը (2011 թ. ՀՀ նախագահի` Իտալիա այցի շրջանակում Երևանի և Վենետիկի քաղաքապետերը ստորագրել են երկու քաղաքների միջև համագործակցության համաձայնագիր):
Զրուցակիցները քննարկել են երկկողմ գործակցության զարգացման հնարավոր ուղղությունները: Տիգրան Սարգսյանը որպես հեռանկարային ոլորտներ առանձնացրել է զբոսաշրջությունը և տեքստիլ արդյունաբերությունը: Զբոսաշրջության զարգացման առումով կարևորվել է օդային ուղիղ հաղորդակցության հաստատումը: Ջորջիո Օրսոնին նշել է, որ իրենք շահագրգռված են նշված բնագավառներում համագործակցության խորացմամբ և պատրաստ են կիսվել իրենց փորձով:
Երկուստեք անհրաժեշտ է համարվել Հայաստանի և Իտալիայի միջև գործարար շփումների ընդլայնումն ու զարգացումը։ Այդ համատեքստում կողմերը ողջունել են այս տարի աշնանը Իտալիայում հայ-իտալական գործարար համաժողովի անցկացումը, ինչը հնարավորություն կտա քննարկել երկկողմ հետաքրքրություն ներկայացնող հարցերի լայն շրջանակ:
Հանդիպման ժամանակ անդրադարձ է եղել նաև երկու երկրների մշակութային դարավոր կապերի սերտացմանը: Այս առումով Վենետիկի քաղաքապետը նշել է, որ դրանում մեծ դեր են խաղացել Սուրբ Ղազար կղզում Մխիթարյան միաբանությունը և Մուրադ-Ռաֆայելյան վարժարանը` որպես պատմական գիտակրթական կենտրոններ: Նա ընդգծել է, որ իրենք ջանք կգործադրեն այս կրթօջախների գործունեությունը վերսկսելու համար:
