Հայաստանում բացվել է կապի առաջին թանգարանը: Այն տեղեկայված է Երևանի Ազատության պողոտայի 24/1 հասցեում: Թանգարանում ներկայացված են հեռախոսային կապի և «ԱրմենՏել» ընկերության զարգացման պատմությանը վերաբերող նյութեր, ինչպես նաև երկրում ներդրված կապի ժամանակակից տեխնոլոգիաների ցուցանմուշներ: Դրանք հնարավորություն են ընձեռում այցելուներին ծանոթանալ Հայաստանում հեռահաղորդակցության տեխնոլոգիաների զարգացման պատմության հետ, ինչպես նաև իմանալ աղետի գոտում կապի վերականգնման գործընթացում հայ կապավորների ունեցած ներդրման մասին:
«Beeline թիմը ձգտում է հաճախորդներին պարգևել ոչ միայն ուրախ շփում, այլև փորձում է պահպանել կապի տեխնոլոգիաների զարգացման պատմությունը սերունդների համար: Ես համոզված եմ, որ այս պատմության էջերը մենք կհամալրենք նոր հաջողություններով և ձեռքբերումներով` Հայաստանի հարուստ փորձին ավելացնելով աշխարհի լավագույն երկրների փորձը»,- նշել է «ՎիմեպելԿոմ» ընկերության ԱՊՀ երկրներում բիզնեսի զարգացման գծով փոխնախագահ Դմիտրի Կրոմսկին:
«ԱրմենՏել»-ի գլխավոր տնօրեն Իգոր Կլիմկոյի խոսքով` Կապի թանգարանը հիմնադրվել է «ԱրմենՏել»-ի կողմից պատմական ժառանգությունը պահպանելու և հեռահաղորդակցության զարգացման պատմությանը ծանոթացնելու նպատակով:
Մոտ ապագայում «ԱրմենՏել»-ը ծրագրում է բացել թեմատիկ գրադարան, ինպես նաև կազմակերպել անվճար այցելություններ դպրոցականների և ուսանողների համար:
