«Ժառանգության» նախընտրական շտաբը միացել է ընտրություններին մասնակցող վեց կուսակցությունների նամակին, որով ՀՀ կառավարությանն առընթեր ազգային անվտանգության ծառայությանն առաջարկվում է մայիսի 6-ից մինչև ընտրությունների արդյունքներն անվավեր ճանաչելու մասին ընտրական հանձնաժողով դիմում ներկայացնելու համար սահմանված ժամկետի ավարտը նշված կուսակցությունների մեկական ներկայացուցչի ընձեռել ՍԵԿՏ համակարգից օգտվելու հնարավորություն, որպեսզի անհրաժեշտության դեպքում կարողանան ստուգել իրենց տեղեկություններով քվեարկությանը մասնակցած այս կամ այն քաղաքացու վերաբերյալ համակարգում առկա տվյալները:
«Մենք երաշխավորում ենք, որ համակարգի միջոցով ստացված տվյալները կօգտագործվեն բացառապես երկու նպատակով` ընտրությունների արդյունքներն անվավեր ճանաչելու պահանջով դիմելիս, տեղամասային ընտրական հանձնաժողովի անդամներին պատասխանատվության ենթարկելու համար ոստիկանությանը դիմելիս»,-ասված է «Ժառանգության» նախընտրական շտաբի տարածած հաղորդագրության մեջ:
Ըստ վերջինիս` ընտրություններին մասնակցող կուսակցություններին ՀՀ ԿԱ ԱԱԾ-ի կողմից տրամադրվելիք նշված հնարավորությունը բավարար չէ Հայաստանից բացակայող քաղաքացիների փոխարեն քվեարկելուն վերաբերող ընտրախախտումները լիարժեքորեն բացահայտելու և պատժելու համար: «Դրա մի տարբերակը ընտրություններին մասնակցած քաղաքացիների ցուցակների հրապարակայնությունն է, ինչը տարիներ շարունակ պահանջել է «Ժառանգությունը», բայց միշտ հետևողականորեն մերժվել է իշխող կոալիցիայի կուսակցությունների կողմից: Իսկ մյուս տարբերակը արտերկրում բնակվող Հայաստանի Հանրապետության հարյուր հազարավոր քաղաքացիների` բնակության երկրներում ՀՀ Սահմանադրությամբ երաշխավորված իրենց ընտրական իրավունքն իրացնելու հնարավորության ապահովումն է, ինչը ՀՀ ընտրական օրենսգրքի հակասահմանադրականության հետևանքով չի իրականացվում»,-նշել է «Ժառանգության» նախընտրական շտաբը:
