«Ադրբեջանի նախագահը, պաշտպանության նախարարն առիթը բաց չեն թողնում ասելու, որ իրենք պատրաստ են ռազմական ճանապարհով հարցը կարգավորել, սակայն Ադրբեջանը կերազեր, որ կարողանար ռազմական ճանապարհով խնդիրը կարգավորել»,- «Երկիր մեդիա» հեռուստատեսության «Երկրի հարցը» հաղորդման շրջանակում նշեց ՀՀ ԱԳ նախկին նախարար, ԱԺ պատգամավոր Ալեքսանդր Արզումանյանը:
Ըստ նրա` սահմանային միջադեպերը, հենց այս օրերին տեղի ունենալով, այս խնդրի վրա են բևեռում նաև Քլինթոնի ուշադրությունը. նրան որոշակի հարց է տրվել իր այցի օրը երեք հայ զինծառայողների սպանության վերաբերյալ, սակայն տիկին Քլինթոնն ընդհանուր պատասխան է տվել` խոսելով խնդրի խաղաղ կարգավորման սկզբունքի մասին:
Քլինթոնի այցի օրակարգը հագեցած է, վստահ է Արզումանյանը, քննարկվելու են հայ-թուրքական, հայ-ադրբեջանական, հայ-իրանական հարաբերություններ և տարածաշրջանային այլ խնդիրներ: Քլինթոնը հայ-թուրքական հարաբերություններում առկա է համարում բանակցությունների գործընթաց` համարելով, որ այս պահին «գնդակը Թուրքիայի դաշտում է», սակայն Ա.Արզումանյանի դիտարկմամբ` այդ հարցն արդեն փակված է, այն «օրակարգից դուրս է եկել Թուրքիայում, իսկ Հայաստանում էլ նոր խոհրդարան է ձևավորվել, որի սեղանի վրա այդ հարցը չկա»:
ՀՀ նորանշանակ կառավարության նպատակն այս պահին, ըստ Արզումանյանի, իշխանության վերարտադրությունն է, որի շրջանակում են լինելու բոլոր հայտարարությունները, գործողությունները: Նախագահական ընտրությունները ևս, ըստ Արզումանյանի, զերծ չեն լինելու ընտրախախտումներից: «Այսօր մենք ընտրախախտումների ավելի մշակված մեթոդների ենք առերեսվում` չկան զանգվածային լցոնումներ, բռնություններ, ընդգծում են եվրոպական պրոցեդուրա ընտրատեղամասերում, իսկ դրանցից դուրս բաժանում են ընտրակաշառք»,- ասաց նա: