Պատերազմի հետևանքով վիրավորում ստացած անձանց մասով բժշակսոցիալական փորձաքննության գործընթացը դեռ շարունակվում է, սակայն մոտ է ավարտին։ Խորհրդարանում պատասխանելով «Լուսավոր Հայաստան» խմբակցության պատգամավոր Կարեն Սիմոնյանի հարցին՝ ասաց աշխատանքի և սոցիալական հարցերի նախարար Մեսրոպ Առաքելյանը։
«Արդեն ունենք պատկեր։ Ծանր վիրավորում ստացած քաղաքացիների թիվը լինելու է շուրջ 500․ դա առնչվում է առաջին և երկրորդ խմբի հաշմանդամություն ունեցողներին, որոնցից առաջին խմբի հաշմանդամություն ունի մոտ 150 մարդ։ Նրանցից պրոթեզավորման կարիք ունեցողների թիվը 120-ի շրջանակում է։ Ավելի թեթև վիրավորում ստացած անձանց թիվը, որոնք կստանան կամ արդեն ունեն երրորդ խմբի հաշմանդամություն, այս պահին մոտ 500 է։ Ընդհանուր առմամբ մեր կողմից շուրջ 1 000 անձի է տրամադրվել հաշմանդամության խումբ»,- ասաց նախարարը։
Նա հայտնեց, որ պատերազմից հետո նախարարությունը բժշկասոցիալական փորձաքննության գործընթացը պարզեցրեց՝ որոշ դեպքերում այցելելով վիրավորում ստացած անձանց բնակարաններ։
