Մարտի 28-ին Հայաստան հասած AstraZeneca պատվաստանյութը դեռ մաքսազերծման և բաշխման փուլում է գտնվում․ այս մասին ապրիլի 7-ին լրագրողների հետ զրույցում ասել է առողջապահության նախարար Անահիտ Ավանեսյանը։
Պատվաստանյութի մաքսազերծման գործըթացի վերաբերյալ մանրամասներ ճշտելու նպատակով ՍիվիլՆեթը կապ հաստատեց առողջապահության նախարարի մամուլի քարտուղար Հռիփսիմե Խաչատրյանի հետ։ Վերջինս ասաց, որ սա «իրենցից կախված գործընթաց չէ, դրա համար պատասխանատու է մաքսայինը»։
Պետական եկամուտների կոմիտեի մամուլի քարտուղար Լուսինե Մկրտչյանը ՍիվիլՆեթին տեղեկացրեց, որ «գործընթացը ունի ընթացակարգ և այդ ընթացակարգով է շարժվում»։
«Այս պահին ձևակերպման փուլում ունենք պատվաստանյութ՝ քովիդի դեմ, պատվիրատուն առողջապահության նախարարությունն է։ Հնարավոր է, որ այս ընթացքում նույնիսկ բացթողման փուլ մտնի պատվաստանյութը։ Գործընթացն ունի ընթացակարգ, անհրաժեշտություն, որպեսզի փաստաթղթերը ստուգվեն, բոլոր ձևակերպումները պետք է լինեն պատշաճ։ Եթե բոլոր փաստաթղթերը ներկայացված և կարգավորված են, ավելորդ տեղը որևէ հանգամանքով ապրանքը չի մնում պահեստում, չունենք շահագրգռվածություն ապրանքը մեկ օր կամ ժամ ավել պահելու պահեստներում»,- ասաց Մկրտչյանը։
Ինչ վերաբերում է Հայաստանի կողմից չինական պատվաստանյութի ձեռք բերմանը՝ առողջապահության նախարարության մամուլի քարտուղարի խոսքով՝ «հնարավոր բոլոր տարբերակներով քննարկումներ ընթանում են»։
«Երկկողմ բանակցություններ տարվում են, բայց չինական պատվաստանյութ ձեռք կբերենք, թե ոչ՝ այս պահին չեմ կարող ասել, որովհետև նման տեղեկատվություն չկա»,- նշեց Խաչատրյանը։
Այսօր՝ ապրիլի 7-ին, Մոսկվայում վարչապետ Նիկոլ Փաշինյանի և Ռուսաստանի նախագահ Վլադիմիր Պուտինի հանդիպումից հայտնի է դարձել, որ վաղը Հայաստանը կստանա «Սպուտնիկ-V» պատվաստանյութի նոր խմբաքանակ՝ 15 հազար դեղաչափ։
Լիա Ավագյան
