Հունիսի 20-ին կայանալիք արտահերթ խորհրդարանական ընտրություններին քվեաթերթիկի վրա գրիչով նշում անելու կարիք չի լինի։ Ընտրողն իր քվեարկությունը կատարելու է հետևյալ կերպ՝ ուղղակի ընտրելու է քվեաթերթիկներից մեկը և այն դնի ծրարի մեջ։ Այս մասին Կենտրոնական ընտրական հանձնաժողովի մայիսի 11-ի նիստում այս մասին ասաց հանձնաժողովի քարտուղար Արմեն Սմբատյանը։
Որոշումը պայմանավորված է Ընտրական օրենսգրքում կատարված փոփոխություններով, որով մեծամասնականից անցում կատարվեց համամասնական ընտրակարգին։
«Քվեաթերթիկի չի ունենալու հետևի հատված, չեն լինելու տարածքային թեկնածուներ, քվեաթերթիկի վրա գրիչ չի օգտագործվելու։ Քվեաթերթիկի վրա ոչ մի նշում չի կատարվելու Ազգային ժողովի ընտրությունների ժամանակ, և ընտրողը իր քվեարկությունը կատարելու է հետևյալ կերպ՝ ուղղակի ընտրելու է քվեաթերթիկներից մեկը և այն դնի ծրարի մեջ»,- հայտնեց Սմբատյանը։
Կենտրոնական ընտրական հանձնաժողովի նախագահ Տիգրան Մուկուչյանն էլ նիստից հետո լրագրողների հետ զրույցում ասաց, որ «բոլոր այն քվեաթերթիկները, որոնք կպարունակեն ավելորդ նշումներ, գրառումներ, կամ ցանկացած որևէ այլ նշագրում, այդ քվեաթերթիկները ճանաչվելու են անվավեր»։
