Հուլիսի 1-ից կոմպակտ դասի նոր ավտոբուսներով կգործարկվի 97 երթուղին

Հուլիսի 1-ից կոմպակտ դասի նոր ավտոբուսներով կգործարկվի համար 97 երթուղին, որը կփոխարինի ավտոբուսային համար 37 երթուղուն: Այս մասին հայտնում է Երևանքի քաղաքապետարանը։

Նոր երթուղու սպասարկումը կիրականացվի 12 միավոր շարժակազմով, ժամը 7:30-ից մինչև 23:00-ն՝ Էրեբունու զանգվածից Նոր Նորքի 1-ին զանգված։

«Կոմպակտ դասի նոր ավտոբուսներով արդեն իսկ շահագործվում են թվով 8 երթուղիներ (հ.հ.26, 38, 99, 74, 24, 47, 22, 46): Այսպիսիով, համայնքային բյուջեի միջոցներով գնված 100 կոմպակտ դասի նոր ավտոբուսներն ամբողջությամբ շահագործվում են՝ սպասարկելով երևանյան 9 երթուղիներ»,- ասված է հաղորդագրությունում։

Քաղաքապետարանից հիշեցնում են, որ պետք է վճարել նստելիս։ Մետաղադրամ ընդունող սարքը «վերցնում է» միայն 100 դրամանոցներ։

«Եթե չունեք 100 դրամանոց, վարորդը սկզբնական շրջանում կարող է մանրել, բայց խիստ ցանկալի է ունենալ 100-դրամանոցը։ Շուտով կունենանք նաև էլեկտրոնային վճարման համակարգ: Ավտոբուսի սրահը տեսահսկվում է՝ ուղևորների և ընդհանրապես, երթևեկության անվտանգության նկատառումներից ելնելով»,- հայտնում են Երևանի քաղաքապետարանից։