Լեռնային Ղարաբաղում առաջին անգամ ցուցադրվել է ռուսական 50 մետրանոց դրոշը. ՌԴ ՊՆ

Լեռնային Ղարաբաղում Ռուսաստանի պետական դրոշի օրվան նվիրված միջոցառում է տեղի ունեցել: Այս մասին հայտնում է Ռուսաստանի պաշտպանության նախարարության կայքը։

«Օգոստոսի 22-ին մենք նշում ենք մեր երկրի պետական դրոշի օրը, այդ տոնը կոչված է համախմբելու բոլոր նրանց, ովքեր նվիրված են իրենց հայրենիքին, ովքեր թանկ են գնահատում իրենց երկրի, իրենց ժողովրդի պատմությունը»,- անձնակազմին դիմել է ռուսական խաղաղապահ զորախմբի հրամանատարի տեղակալ գեներալ-մայոր Օլեգ Եգորովը:

Հանդիսավոր միջոցառմանը մասնակցել են խաղաղապահ զորակազմի զինծառայողներ և կամավորներ:

«Այսօր առաջին անգամ խաղաղապահ զորակազմի մշտական տեղակայման կետի տարածքում տեղի է ունեցել տոնական միջոցառման անցկացում՝ նվիրված ռուսական դրոշի օրվան։ Ռուսաստանից բերվել է ռուսական 50 մետր երկարությամբ և 5 մետր լայնությամբ դրոշը: Այն ցուցադրվել է ողջ անձնակազմին»,- ասել է Օլեգ Եգորովը։

Միջոցառումն ավարտվել է Ռուսաստանի Դաշնության 50 մետրանոց դրոշի՝ հանդիսավոր երթով ցուցադրությամբ և ռազմահայրենասիրական երգերի կատարմամբ։