Սյունիքի մարզում ճանապարհների փակման ադրբեջանական զինուժի գործողությունները Հայաստանի համար անսպասելի չեն եղել․ օգոստոսի 27-ի կառավարության հերթական նիստում հայտարարեց վարչապետ Նիկոլ Փաշինյանը՝ հավելելով, որ Էյվազլի-Չայզամի հատվածներում Ադրբեջանի զինված ուժերի կողմից ճանապարհների փակումը հակասում է 2020-ի դեկտեմբերին ձեռք բերված պայմանավորվածություններին։
«Այդ ակցիան արվել է մեր կողմից առաջ քաշված խաղաղության օրակարգին հարվածելու ու այդ օրակարգը վարկաբեկելու համար»,- ասաց Փաշինյանը՝ զգուշացնելով, որ նման միջադեպեր էլի կարող են լինել։ Ադրբեջանական կողմը հայտարարել էր, որ Սյունիքի մարզի այդ հատվածներում ՀՀ ԶՈՒ զինծառայողների կողմից դանակահարվել էր ադրբեջանցի զինծառայող։ Փաշինյանը հերքում է այս վարկածը, միևնույն ժամանակ, առաջարկում համատեղ հետաքննություն անցկացնել դեպքի վերաբերյալ։
«Ամեն դեպքում միջհամայնքային ու հանրապետական նշանակության ճանապարհների հիմնանորոգման մեր աշխատանքները պիտի իրականացվեն, մինչև տարեվերջ Տաթև-Աղվանի ճանապարհի վերանորոգումը պիտի ավարտվի, համայնքների անխափան կապը մարզկենտրոնի հետ պիտի ավելի որակյալ դառնա»,- նշեց Փաշինյանը։ Նա Թուրքիայի կողմից որոշակի դրական ազդակների մասին խոսեց՝ ասելով, որ դրական ազդակներին Հայաստանը դրական ազդակներով կպատասխանի։
https://www.civilnet.am/news/630767/%d5%a3%d5%b8%d6%80%d5%ab%d5%bd-%d5%af%d5%a1%d5%ba%d5%a1%d5%b6-%d5%b3%d5%a1%d5%b6%d5%a1%d5%ba%d5%a1%d6%80%d5%b0%d5%ab%d5%b6-%d5%b4%d5%ab-%d6%84%d5%a1%d5%b6%d5%ab-%d5%bf%d5%a1%d5%bd%d5%b6%d5%b5%d5%a1%d5%af-%d5%a2%d5%a5%d5%bc%d5%b6%d5%a1%d5%bf%d5%a1%d6%80%d5%b6%d5%a5%d6%80-%d5%a5%d5%b6-%d5%af%d5%b8%d6%82%d5%bf%d5%a1%d5%af%d5%be%d5%a5%d5%ac-%d5%a1%d5%b5%d5%a4-%d5%a9%d5%be%d5%b8%d6%82%d5%b4%d5%9d-%d5%ab%d6%80%d5%a1%d5%b6%d5%a1%d5%af%d5%a1%d5%b6/
