Կառավարության այսօրվա՝ սեպտեմբերի 8-ի նիստի սկզբում վարչապետ Նիկոլ Փաշինյանն անդրադարձել է սահմանակից պետությունների հետ հարաբերությունների խորացման ու կարգավորման հնարավորություններին:
«Օգոստոսի 24-ին Ազգային ժողովում կառավարության գործունեության հնգամյա ծրագիրը ներկայացնելիս ես արձանագրեցի, որ սահմանակից երկրների հետ հարաբերությունների խորացումը կամ կարգավորումը կառավարության արտաքին քաղաքականության կարևոր ուղղություններից է լինելու և սա արձանագրված է Ազգային ժողովի կողմից ընդունված ծրագրում և այդ ծրագրի իրագործումը, ահա, դարձել է աշխատանքային օրակարգ մեզ համար»,- ասել է նա։
Հյուսիսային և հարավային հարևանների հետ հաղորդակցության ուղիների կարևորությունը
Փաշինյանը նշել է, որ վարչապետի պաշտոնում վերանշանակվելուց հետո արդեն հասցրել է այցելել Իրան, այսօր էլ մեկնում է Վրաստան։ Նրա խոսքով՝ թե Իրանի, թե Վրաստանի հետ քննարկումների օրակարգում էական դեր է խաղում տարածաշրջանային կոմունիկացիաների զարգացման թեման․ «Այս համատեքստում կարևորում եմ Հյուսիս-հարավ նախագիծը, որն Իրանի հետ մեր սահմանը կապում է Վրաստանի հետ մեր սահմանին։ Մեզ համար չափազանց կարևոր է նաև երկաթուղային կապի հաստատումը Ռուսաստանի Դաշնության և Իրանի հետ»։
Տարածաշրջանի ապաշրջափակման եռակողմ խմբի, Հայաստան-Ադրբեջան հարաբերությունների մասին
«Երկաթուղային կապի խնդիրը լուծելու համար՝ Հայաստան-Ռուսաստան-Ադրբեջան եռակողմ ձևաչափով քննարկում ենք կոմունիկացիաների վերաբացման հարցը։ Այստեղ մենք վճռական ենք ջանքեր գործադրել կոնկրետ արդյունքների համար՝ գիտակցելով, իհարկե, որ Ադրբեջանն էլ իր հերթին ակնկալում է հաղորդակցություն ստանալ իր արևմտյան շրջանների և Նախիջևանի միջև»,- ասել է Նիկոլ Փաշինյանը։
Վարչապետը հայտնել է, որ Հայաստանը տրամադրված է «վերականգնել Ադրբեջանի հետ խաղաղ գործընթացը» ԵԱՀԿ Մինսկի խմբի համանախագահության շրջանակներում։ Նա կարևորել է նաև Ադրբեջանի հետ սահմանազատում և սահմանագծում իրականացնելու օրակարգը։
Հայ-թուրքական հարաբերություններ
Ինչ վերաբերում է Հայաստան-Թուրքիա հարաբերություններին և Թուրքիայի նախագահի վերջին հայտարարություններին, Փաշինյանը նշել է․ «Թուրքիայի նախագահի հայտարարություններում մենք տեսնում ենք Հայաստան-Թուրքիա հարաբերությունները կարգավորելու, հայ-թուրքական երկաթուղին և ճանապարհները վերագործարկելու մասին խոսելու հնարավորություն և մենք պատրաստ ենք նման խոսակցության, որը վերը նկարագրված ֆոնին կարող է ավելի լայն համատեքստ ստանալ։ Մեծ հաշվով խոսքը մեր տարածաշրջանն արևելքն արևմուտքին, հյուսիսը հարավին կապող խաչմերուկ դարձնելու մասին է։ Ուրախությամբ պետք է արձանագրեմ, որ այս գործընթացին ակտիվորեն աջակցելու հրապարակային պատրաստակամություն է ցուցաբերել Ռուսաստանը։ Եվրամիությունը, Ֆրանսիան և Միացյալ նահանգները նույնպես հետաքրքրված են այս գործընթացով, իսկ Չինաստանի և Հնդկաստանի շահագրգռվածությունը կոմունիկացիոն նախագծերի զարգացման ուղղությամբ հայտնի է»։
