Սեպտեմբերի 9-ին Հայաստանի պաշտպանության նախարար Արշակ Կարապետյանն ընդունել է Արցախում ռուսական խաղաղապահ ուժերի նորանշանակ հրամանատար, գեներալ-մայոր Միխայիլ Կոսոբոկովին։ Այս մասին հայտնում է Հայաստանի ՊՆ-ը։
Հանդիպմանը մասնակցել են նաև Հայաստան ռուսական 102-րդ ռազմական բազայի հրամանատար, գնդապետ Դմիտրի Օվչարովը և Հայաստանում Ռուսաստանի դեսպանության պաշտպանական հարցերով կցորդ, գնդապետ Իգոր Շչերբակովը:
«Հանդիպման սկզբին ՀՀ պաշտպանության նախարարը շնորհավորել է գեներալ-մայոր Միխայիլ Կոսոբոկովին՝ պաշտոնն ստանձնելու կապակցությամբ և հաջողություններ մաղթել խաղաղապահ առաքելության ընթացքում: Արշակ Կարապետյանը շնորհավորել է նաև գնդապետ Դմիտրի Օվչարովին՝ ՌԴ 102-րդ ռազմական բազայի հրամանատարի պաշտոնում նշանակվելու առիթով և կարևորել Հայաստանի տարածքում տեղակայված ռուսաստանյան ստորաբաժանման դերն ու նշանակությունը»,- ասված է հաղորդագրությունում։
Կարապետյանը բարձր է գնահատել Ռուսաստանի ջանքերը՝ ուղղված տարածաշրջանում ռազմաքաղաքական իրավիճակի կայունացմանը, ինչպես նաև Արցախում իրականացվող խաղաղապահ առաքելության ընթացքն ու արդյունավետությունը։ Հանդիպման ընթացքում կարծիքներ են փոխանակվել նաև տարածաշրջանային անվտանգության խնդիրների շուրջ:
***
Ավելի վաղ Միխայիլ Կոսոբոկովը զբաղեցրել է 58-րդ համազորային բանակի հրամանատարի տեղակալի պաշտոնը (Հարավային օկրուգ)։ Կոսոբոկովը ղեկավարել է նաև Աբխազիայի ռուսական ռազմակայանը։
