Հիփոթեքով բնակարաններ ձեռք բերած և եկամտահարկի վերադարձի մեխանիզմից օգտվող քաղաքացիները հարկային մարմին իրենց դիմումներն այսուհետ հասցեագրելու են միայն էլեկտրոնային եղանակով։ Համապատասխան որոշման նախագծի հեղինակը Պետեկամուտների կոմիտեն է, այն ընդգրկված է սեպտեմբերի 24-ի կառավարության նիստի օրակարգում։
Եկամտահարկի վերադարձի մեխանիզմով բնակարան ձեռք բերած քաղաքացիները ներկայիս կարգավորմամբ եռամսյակը մեկ թղթային տարբերակով դիմում են հասցեագրում ՊԵԿ-ին՝ հաշվարկված տոկոսագումարները եկամտահարկի տեսքով հետ ստանալու համար։ Այժմ ՊԵԿ-ն առաջարկում է այս մեխանիզմը դարձնել էլեկտրոնային։
«Նախագծով առաջարկվում է սահմանել, որ եկամտային հարկի վերադարձի համար հիպոտեկային վարկի վարկառու և (կամ) համավարկառու հանդիսացող անձանց կողմից եկամտային հարկի վերադարձման մասին դիմումները ներկայացնում են բացառապես էլեկտրոնային եղանակով։ Նախատեսվում է նաև հիպոտեկային վարկի սպասարկման համար վճարված տոկոսների մասին տեղեկանքը բացառապես ԱՔՌԱ վարկային բյուրոյի միջոցով էլեկտրոնային եղանակով հարկային մարմին ներկայացնելու կարգավորումներ», – նշված է որոշման նախագծում։
Նոր կարգավորմամբ քաղաքացիների եկամտահարկի վերադարձը կկազմակերպվի երեք օրվա ընթացքում։ Այս նպատակի համար նախատեսվում է նաև ստեղծել հատուկ էլեկտրոնային հարթակ։
