Թուրքիայի արտաքին գործերի նախարար Մևլութ Չավուշօղլուն հայտարարել է, որ Հայաստանի արտգործնախարար Արարատ Միրզոյանի հետ հանդիպում անցկացնելու պլաններ չկան։ Թուրքիայի ԱԳՆ ղեկավարն այս մասին ասել է այսօր՝ սեպտեմբերի 27-ին, Ստամբուլում Թյուրքական խորհրդի արտգործնախարարների մակարդակով նիստին հաջորդած մամուլի ասուլիսում, փոխանցում է ՏԱՍՍ-ը։
«Ոչ, ես նման ծրագրեր չունեմ (Հայաստանի արտգործնախարարի հետ հանդիպման – խմբ․)։ Մենք ի սկզբանե ցանկանում էինք, որ տարածաշրջանն այժմ դառնա խաղաղության և կայունության գոտի։ Այդ ուղղությամբ Ադրբեջանը Հայաստանին համապարփակ խաղաղության պայմանագիր է առաջարկել։ Դրական պատասխան (Հայաստանից – խմբ․) դեռ չի ստացվել»,- ասել է Չավուշօղլուն։
Բացի այդ, Թուրքիայի արտգործնախարարը նշել է, որ Անկարան մտադիր է Բաքվի հետ համակարգել «բոլոր քայլերը, որոնք այժմ ձեռնարկվում են և որոնք պետք է ձեռնարկվեն հետագայում»:
***
Հայաստանի և Թուրքիայի ղեկավարները վերջին շրջանում հրապարակայնորեն հայտարարում են հարաբերությունները կարգավորելու պատրաստակամության մասին։ Օգոստոսի 26-ին Թուրքիայի նախագահ Ռեջեփ Էրդողանն ասել էր, թե «Ղարաբաղյան վերջին պատերազմից հետո տարածաշրջանի խաղաղության համար առաջընթացի նոր հնարավորություններ են ստեղծվել, և այդ ուղղությամբ Հայաստանի դրական քայլերի պարագայում Թուրքիան համարժեք կարձագանքի»: Հայաստանի վարչապետ Նիկոլ Փաշինյանը կառավարության օգոստոսի նիստում հայտարարել էր, որ «Թուրքիայի կողմից որոշակի դրական հրապարակային ազդակներ կան»: Փաշինյանն ասել էր, որ դրական ազդակներին Հայաստանը դրական ազդակներով կպատասխանի։
https://www.civilnet.am/news/632141/%d5%b4%d5%a5%d5%b6%d6%84-%d5%ba%d5%a1%d5%bf%d6%80%d5%a1%d5%bd%d5%bf-%d5%a5%d5%b6%d6%84-%d5%b0%d5%a1%d5%b5%d5%a1%d5%bd%d5%bf%d5%a1%d5%b6-%d5%a9%d5%b8%d6%82%d6%80%d6%84%d5%ab%d5%a1-%d5%b0%d5%a1%d6%80%d5%a1%d5%a2%d5%a5%d6%80%d5%b8%d6%82%d5%a9%d5%b5%d5%b8%d6%82%d5%b6%d5%b6%d5%a5%d6%80%d5%a8-%d5%af%d5%a1%d6%80%d5%a3%d5%a1%d5%be%d5%b8%d6%80%d5%a5%d5%ac%d5%b8%d6%82-%d5%ad%d5%b8%d5%bd%d5%a1%d5%af%d6%81%d5%b8%d6%82%d5%a9%d5%b5%d5%a1%d5%b6%d5%a8%e2%80%a4-%d6%83%d5%a1%d5%b7%d5%ab%d5%b6%d5%b5%d5%a1%d5%b6/
