«Վարչապետի գավաթը» հարկատուներին կարժենա շուրջ 36 մլն դրամ

Կառավարության հոկտեմբերի 7-ի նիստի օրակարգում ներառվել է 25 հարց, որոնցից միայն երկուսն են զեկուցվող, այդ թվում՝ «Հայաստանի Հանրապետության Վարչապետի գավաթ» սիրողական կրոսավազքի մրցաշարին վերաբերող նախագիծը։

Այդ փաստաթղթով Կրթության, գիտության, մշակույթի և սպորտի նախարար Վահրամ Դումանյանն առաջարկեց մրցաշարի անցկացման համար ՀՀ կառավարության պահուստային ֆոնդից հատկացնել շուրջ 36 մլն դրամ։

Ըստ գերատեսչության՝ վերջին երկու տարիներին հանրապետությունում տիրող կորոնավիրուսային իրավիճակը զգալիորեն նվազեցրել է բնակչության ֆիզիկական ակտիվության մակարդակը, հատկապես աշակերտների և ուսանողների շրջանում:

«Ֆիզիկական թերակտիվության պատճառով պետությանն ու հասարակությանը սպառնացող վտանգների չեզոքացումը` պետության առաջնային խնդիրներից է»,- նշված է նախագծում։

Մրցաշարը նախատեսվում է անցկացնել Երևան-Էջմիածին մայրուղում՝ (Արմավիրի մարզի Էջմիածնի տարածաշրջանում) 2021-ի հոկտեմբերի 30-ին։ Կառավարությունը գումարը ուղղակի դրամաշնորհի ձևով տրամադրելու է «Հատիս» սպորտային բարեգործական հիմնադրամին։