Հոդվածը՝ Թաթա Շոշիաշվիլիի, OC Media
Երեք մարդ է ձերբակալվել Բաթումիում բնակելի շենքի փլուզման գործով, որի հետևանքով զոհվել է ինը մարդ, այդ թվում ՝ երեք երեխա:
Ձերբակալվածներից մեկը շենքի առաջին հարկի բնակարաններից մեկի սեփականատերն է՝ Զաուր Բուդաթովը, մյուս երկուսը շինարարարներ են՝ հայր և որդի Հուսեյն և Գիորգի Սուրմանիձեները, որոնց ենթադրաբար վարձել էին բնակարանը վերանորոգելու համար:
Ըստ Վրաստանի ներքին գործերի նախարարության՝ բնակարանում շինարարական և վերանորոգման աշխատանքներն իրականացվել են «անվտանգության կանոնների կոպիտ խախտմամբ», ինչը հանգեցրել է շենքի փլուզմանը:
Շենքը փլուզվել է հոկտեմբերի 8-ի կեսօրին մոտ, այդ պահին շենքում բազմաթիվ մարդիկ են եղել: Որոնողափրկարարական ծառայությունների գրեթե 30-ժամյա աշխատանքից հետո փլատակների տակ արգելափակվածներից միայն մեկ մարդ է ողջ մնացել:
Ըստ Վրաստանի դատախազության՝ աղետի պատճառ դարձած վերանորոգման աշխատանքներն իրականացվել են առանց թույլտվության և «ինժեներական ու անվտանգության կանոնների խախտմամբ, առանց համապատասխան ինժեներական գիտելիքներ ունեցող մասնագետի մասնակցության»:
«Մեղադրյալներն ապամոնտաժել են ինչպես հիմնական, այնպես էլ ոչ հիմնական կառույցներ [պատեր]՝ դրանով իսկ խարխլելով բնակելի շենքի ամրությունն ու դիմացկունությունը»,- ասվում է դատախազության հայտարարությունում։
Բաթումիի փոխքաղաքապետ Լելա Սուրմանիձեն հայտարարել է, որ «տան ներսում վերանորոգման աշխատանքների համար քաղաքապետարանից թույլտվություն անհրաժեշտ չէ», և որ իրենք տեղյակ չեն եղել, թե ինչ է կատարվում շենքի ներսում:
Նշված երեք անձանց մեղադրանք է առաջադրվել անվտանգության կանոնների խախտման և գույքային վնասի համար, որոնք մահվան պատճառ են դարձել։ Մեղավոր ճանաչվելու դեպքում նրանց սպառնում է մինչև տասը տարվա ազատազրկում: Կասկածյալների նկատմամբ խափանման միջոց է ընտրվել կալանավորումը։ Նրանց դատավարությունը կսկսվի դեկտեմբերի 1-ին:
Նրանց փաստաբանները պատրաստվում են բողոքարկել խափանման միջոց կալանքը և հայտարարել են, թե չկա որևէ ապացույց, որ իրենց պաշտպանյալներն անտարբերություն են դրսևորել և հավելել են, որ նրանք գործել են աշխատանքային պլանի համաձայն:
«Ազատություն» ռադիոկայանի փոխանցմամբ՝ շենքը կառուցվել է 1978-ին և ի սկզբանե նախագծվել է որպես հինգհարկանի շենք՝ չնայած շինարարության ընթացքում ավելացվել է վեցերորդ հարկը: Մեկ այլ հարկ ավելացվել է 2000-ականներին, և հինգ-վեց տարի առաջ մուտքում տեղադրվել է նաև վերելակ:
Թբիլիսոբան չեղարկվել է
Վրաստանի վարչապետ Իրակլի Ղարիբաշվիլին երկուշաբթին սգո օր է հայտարարել երկրում։
«Խորապես ցավակցում եմ Բաթումիում տեղի ունեցած ողբերգության համար, ցավակցում եմ զոհերի ընտանիքների անդամներին և հարազատներին»,- ասել է նա: «Նրանց հետ ողջ Վրաստանն է սգում այս սարսափելի ողբերգությունը: […] Միջադեպի զոհերին պետությունը կտրամադրի անհրաժեշտ աջակցություն»:
Թբիլիսիի քաղաքապետ և իշխող «Վրացական երազանք» կուսակցության գլխավոր քարտուղար Կախա Կալաձեն հայտարարել է, որ Թբիլիսոբայի [Թբիլիսիի տոնն է – խմբ․] տոնակատարությունների համար նախատեսված գումարը կհատկացվի զոհերի ընտանիքներին: Այս տարվա Թբիլիսոբան նախատեսվում էր անցկացնել ամբողջությամբ առցանց, միջոցառման համար հատկացված էր գրեթե 500 000 լարի (160 000 դոլար):
Վրաստանում ԵՄ պատվիրակությունը նույնպես ցավակցական հայտարարություն է հրապարակել:
«Երկրում սգո այս օրը մենք վշտակցում ենք Բաթումիում ողբերգական կորսված կյանքերի համար: Մեր մտքերն ու ցավակցությունները նրանց ընտանիքների և ընկերների հետ են»,- ասվում է հայտարարությունում։
Հարևան շենքում բնակվող տասներկու ընտանիք ժամանակավորապես տեղափոխվել է հյուրանոցներ: