ԲԱԳՐԱՏ ԷՍԴՈՒԳԵԱՆ
Ինչպէս նախապէս ալ գրած էինք, Թուրքիոյ քաղաքական օրակարգին վրայ թէեւ պաշտօնապէս ոչ մէկ ազդանշան գոյութիւն ունի, բայց երկիրը մատնուած է նախընտրութեան յատուկ քաղաքական տրամադրութիւններու։ Այդ իսկ պատճառաւ ալ ընդդիմադիր քաղաքական գործիչներ յաճախ կը շրջին երկրի զանազան քաղաքները եւ կը փորձեն ժողովուրդի դժգոհութիւնները օրակարգի բերել։ Տնտսեական ճգնաժամի առկայութեան մէջ թէ սղաճը եւ թէ գործազրկութիւնը կը շարունակեն համատարած դժգոհութեան գլխաւոր գործօնները հանդիսանալ։ Միւս կողմէ իշխանութիւնն ալ ընդդիմութեան այս գործընթացին դէմ կը տանի բոլորովին տարբեր ռազմավարութիւն մը ու կը փորձէ ներկայ դժուարութիւններու մեղքը փաթթել ընդդիմադիրներու գլխին։ Բնականաբար հասարակութեան ջախջախիչ մեծամասնութեան համար համոզիչ չի թուիր այս վարկածը, բայց պէտք է յիշել որ այդ անտրամաբանական պնդումն ալ ունի իր յաճախորդը, որն է բոլոր պայմաններու մէջ կոյրզկուրայն Էրտողանի եւ անոր քաղաքականութիւններուն հաւատարիմ մնացած խաւ մը։ Արդէն յայտնի է որ Նախագահ Էրտողան ալ կը փորձէ այդ խաւի հաւատարմութիւնը ամրապնդել։
Այս պայմաններու տակ վերստին այժմէականութիւն կը ստանան հասարակութեան կամքը ուսումնասիրող հարցարանները։ Անոնց տուեալներուն համաձայն մինչեւ մօտ օրեր Էրտողանի իշխանութիւնը կը կորսնցնէր իր վարկանիշները եւ սակայն չէր բարձրանար ընդդիմադիրներու ստացած զօրակցութիւնը։ Իսկ վերջերս այդ գետնի վրայ ալ կարեւոր փոփոխութիւններ կ՚արձանագրուին եւ ընդդիմադիրներն ալ կը բարձրացնեն իրենց վիճակած ձայները։
Այս բոլորը պատճառ կը դառնան երկրէ ներս տիրող լարուածութեան ալ աճին։ Այդ իսկ պատճառաւ առաջին հերթին Հանրապետական Կուսակցութեան նախագահ Քըլըչտարօղլու մտահոգութիւն յայտնեց քաղաքական բնոյթով մահափորձներու հաւանականութեան մասին։ Ընդդիմադիր միւս կուսակցութիւններն ալ ձայնակցեցան այդ մտահոգութեան, յատկապէս հիմք ունենալով նախագահ Էրտողանի անցեալները ընդդիմադիր կուսակցապետ Մերալ Աքշեների ենթարկուած յարձակումին դէմ արտասանած. «Դեռ ասոնք լաւ օրերդ են, տե՛ս տակաւին ինչեր պիտի պատահին» խօսքին։
Արդարեւ նախագահ Էրտողան Սուրիոյ մէջ երկու թուրք ոստիկաններու սպանութեան նիւթին անդրադառնալով յայտարարեց թէ այլեւս յորդած է համբերութեան բաժակը եւ իրենք ստիպուած են արժանի պատասխանը փոխադարձելու, եթէ ստացուի Սուրիոյ մէջ խարսխած դաշնակիցներու ապա թէ ոչ սեփական միջոցներու գործադրութեամբ։
Արդէն զօրաշարժ մը սկսած է դէպի Սուրիա ու բազմաթիւ հրասայլեր մեկնելով Իսքենտերունի ռազմապազաներէն ուղղուած են հարեւան երկրի հիւսիսային հատուածները։
Միջազգային դիտորդներ այս ռազմավարութիւնն ալ կը գնահատեն մօտալուտ ընտրութեան մը հաւանականութեան սահմաններուն մէջ, աւելի ճիշդ ընտրութենէ խուսափելու եւ հասարակութեան ուշադրութիւնը ուրիշ կէտեր շեղելու փորձ մը ըլլալով։
Այս ընդհանուր պատկերին մէջ հետզհետէ կը յստականայ այն իրողութիւնը ըստ որու Թուրքիա մօտ ապագային հետզհետէ ալ աւելի կը մխրճուի անկանխատեսելի ու խիստ վտանգաւոր դրութեան մը մէջ։
