Թաթա Շոշիաշվիլի, OC Media
Վրաստանի ֆինանսների նախարարությունը ինը մարդու մեղադրանք է առաջադրել Կովիդ-19-ի կեղծ անձնագրեր պատրաստելու և օգտագործելու համար, որոնք հաստատում են պատվաստումը և թեստերի բացասական արդյունքները:
Նախարարության քննչական վարչությունը տեղեկացրել է, որ Թբիլիսիում և Իմերեթիի շրջանում անձնագրեր կեղծելու երկու դեպք է հայտնաբերել։
Արդեն մեկ մարդ է ձերբակալվել Թբիլիսիում երկու կեղծ Կովիդ-19 վկայագրի դիմաց 140 եվրո (160 դոլար) գանձելու համար:
Նախարարության տվյալներով՝ անձնագրերն օգտագործվել են արտասահման մեկնելու ժամանակ պարտադիր կարանտինից խուսափելու համար։
Գերատեսչության հաղորդագրությունում ասվում է, որ ձերբակալվածը կեղծ տեղեկատվություն է ներկայացրել, որ ստացողն իբր անցել է Կովիդ-19-ի պատվաստման ամբողջական կուրսը և ունի լաբորատոր անալիզների բացասական արդյունքներ:
Նախարարությունը հայտնել է, որ առգրավել է Կովիդ-19-ի կեղծ փաստաթղթեր, կնիքներ և կեղծ վկայագրեր՝ նախատեսված այլ անձանց վաճառելու համար, ինչպես նաև դրանց պատրաստման համար օգտագործվող համակարգչային սարքավորումներ:
Մեկ այլ գործով Իմերեթիում հայտնաբերվել է ութ մարդ, որ, ըստ իշխանությունների, «պետական սահմանը հատելիս կորոնավիրուսի վերահսկողության կանոնները շրջանցելու նպատակով գնել և օգտագործել են կեղծ փաստաթղթեր, որոնք ցույց են տալիս կորոնավիրուսի ՊՇՌ թեստի բացասական արդյունքներ՝ տրված բժշկական հաստատությունների անունից»:
Նախարարության հայտարարության համաձայն՝ մեղադրյալներին սպառնում է մինչև երեք տարվա ազատազրկում։
Սա Վրաստանում Կովիդի վկայագրերի կեղծման առաջին դեպքը չէ։ Օգոստոսին Վրաստանի պետական անվտանգության ծառայությունը հայտարարել էր, որ ձերբակալել է յոթ մարդու Կովիդ-19-ի կեղծ վկայագրեր պատրաստելու և գնելու համար:
Վրաստանում բնակչության ընդամենը 32 տոկոսն է մինչ այժմ լիովին պատվաստվել, թեև առողջապահական մարմինները նախազգուշացրել են, որ համաճարակի հինգերորդ ալիքն է հասել երկիր: