ԵԱՀԿ Մինսկի խմբի համանախագահներ Էնդրյու Շոֆերը՝ Ամերիկայի Միացյալ Նահանգներից, Իգոր Խովաեւը՝ Ռուսաստանի Դաշնությունից եւ Բրայս Ռոքֆոյը՝ Ֆրանսիայից, Ստոկհոլմում հրապարակել են հետեւյալ հայտարարությունը․
«Համանախագահները դեկտեմբերի 1-ին հանդիպել են Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեհուն Բայրամովի հետ՝ դեկտեմբերի 2-ին Ստոկհոլմում կայացած ԵԱՀԿ նախարարների խորհրդի շրջանակում: Համանախագահները հանդիպել են նաև ԵԱՀԿ գործող նոր նախագահ, Լեհաստանի արտաքին գործերի նախարար Զբիգնև Ռաուի հետ: Հանդիպումներին մասնակցել է ԵԱՀԿ գործող նախագահի անձնական ներկայացուցիչ Անջեյ Կասպրշիկը:
Համանախագահները ափսոսանք են հայտնում, որ չհաջողվեց իրենց հովանու ներքո Հայաստանի և Ադրբեջանի արտգործնախարարների հանդիպում անցկացնել Ստոկհոլմում։ Նրանք պատրաստակամություն են հայտնում անցկացնել նման հանդիպում, հենց որ թույլ տան հանգամանքները, շարունակել քննարկումները, որոնք սկսվել են Նյու Յորքում սեպտեմբերին եւ Փարիզում՝ նոյեմբերին»:
