Ռոբին Ֆաբրո, OC Media
Վրաստանի Ազգային բանկը (կենտրոնական բանկ) ուրբաթ առավոտյան հայտարարել է, որ ֆինանսական աջակցություն կտրամադրի ռուսական ՎՏԲ բանկի վրացական մասնաճյուղին։ Ավելի ուշ հայտարարության տեքստը հեռացվել է և փոխարինվել բանկային ավանդատուների շահերը պաշտպանելու ավելի անորոշ խոստմամբ:
ԱՄՆ-ը, ԵՄ-ն և Մեծ Բրիտանիան պատժամիջոցներ են սահմանել ռուսական մի քանի բանկերի, այդ թվում՝ պետական ՎՏԲ բանկի նկատմամբ այն բանից հետո, երբ հինգշաբթի Ռուսաստանը լայնածավալ ներխուժում սկսեց Ուկրաինա:
Պատժամիջոցները ներառում են այս բանկերին դոլարով, եվրոյով և այլ արտարժույթով գործարքներ իրականացնելու արգելքը։
Ուրբաթ օրվա իր նախնական հայտարարության մեջ Վրաստանի Ազգային բանկը նշել էր, որ ավելի վաղ մշակել էին «գործողությունների ծրագիր» այն պարագայի համար, երբ պատժամիջոցներ կիրառվեն ՎՏԲ-ի նկատմամբ, և որ արդյունքում երկու բանկերն էլ «լիովին պատրաստ են ներկա իրավիճակին»։
Ըստ Ազգային բանկի՝ իրենք մշակել են պլանը «հնարավոր ռիսկերը չեզոքացնելու» համար, թեև չի նշվում, թե որոնք են այդ ռիսկերը և ում համար:
«Լրացուցիչ իրացվելիության անհրաժեշտության դեպքում [Ազգային բանկը] պատրաստ է [«ՎՏԲ Վրաստանին»] տրամադրել ֆինանսական համապատասխան միջոցներ»,- ասվում էր Ազգային բանկի ջնջված հայտարարության մեջ։
Հայտարարության հրապարակումից ժամեր անց Ազգային բանկը հեռացրել է այն կայքից՝ փոխարինելով նոր հայտարարությամբ, որտեղ միայն անորոշ հղումներ են արվել բանկի վրացի հաճախորդներին օգնելու համար «օրենքով նախատեսված գործիքների» օգտագործման մասին:
«Մեր խնդիրն է պաշտպանել բանկային ավանդատուների, Վրաստանի քաղաքացիների շահերը և հոգ տանել երկրի ֆինանսական համակարգի կայունության մասին՝ հաշվի առնելով պատժամիջոցների պայմանների կատարումը»,- ասել են նրանք։
«Այդ իսկ պատճառով Ազգային բանկը ուշադիր հետևում է իրադարձություններին և անհրաժեշտության դեպքում պատրաստ է պաշտպանել բանկի ավանդատուների շահերը՝ օգտագործելով միջազգային չափանիշներն ու օրենքով նախատեսված գործիքները»։
OC Media-ին տրամադրված հայտարարությունում, մինչ Ազգային բանկը կհեռացներ իր նախնական հայտարարությունը, «ՎՏԲ Վրաստանը» հաստատել է, որ Ազգային բանկը առաջարկել է տրամադրել «համապատասխան միջոցներ», եթե իրենք լրացուցիչ իրացվելիության կարիք ունենան:
ՎՏԲ-ում ասել են, որ պատրաստ են ամբողջությամբ մարել հաճախորդների հանդեպ բոլոր պարտավորությունները, ներառյալ այլ բանկերին միջոցներ փոխանցելը կամ կանխիկացման կամ վճարումների կատարումը:
Ազգային բանկը չի պատասխանել էլեկտրոնային փոստով մեկնաբանության խնդրանքին, իսկ մամուլի խոսնակը ուրբաթ կեսօրից հետո անջատել է հեռախոսը ։
Ուրբաթ Վրաստանի վարչապետ Իրակլի Ղարիբաշվիլին ասել է, որ չի միանա Ռուսաստանի դեմ արևմտյան պատժամիջոցներին՝ վկայակոչելով Վրաստանի «ազգային շահերը»:
