Թաթա Շոշիաշվիլի, OC Media
Կիևի համալսարանը հրապարակավ մեղադրել է Աջարիայի Ինքնավար Հանրապետության ղեկավարին՝ պնդելով, որ նա դուրս է մնացել դոկտորական ծրագրից, թեև Աջարիայի կառավարության պաշտոնական կայքում նրա կենսագրությունում հակառակն է ասվում։
Կիևի համալսարանն այս քայլին գնացել է այն բանից հետո, երբ Թոռնիկե Ռիժվաձեն, որը նաև իշխող «Վրացական երազանք» կուսակցության քաղաքական խորհրդի անդամ է, հրաժարվել է Ռուսաստանին մեղադրել Ուկրաինա ներխուժելու համար:
Երկուշաբթի «Փիրվելի» հեռուստաընկերությունը Ռիժվաձեին հարցրել էր, թե ով է իր կարծիքով սկսել պատերազմն Ուկրաինայում, ինչին Աջարիայի ղեկավարը պատասխանել էր, թե «պետք է ոլորտի փորձագետներին հարցնել»։ «Ուկրաինացիներին մաղթում եմ, որ այս պատերազմը շատ շուտ ավարտվի»,- ասել էր նա։
Հաջորդ օրը «Միրոտվորեց»-ը, որը մարդու իրավունքների պաշտպանությամբ զբաղվող՝ Կիևում տեղակայված կազմակերպություն է և հրապարակում է տեղեկատվություն, որպեսզի մատնացույց անի այն անձանց, որոնց համարում է ռուսամետ, հայտարարեց, որ Ռիժվաձեն ռուսների ռազմական հանցագործների աջակից է, ժխտում է Ուկրաինա ներխուժումը և Ուկրաինայի դեմ մարդասիրական իրավունքները խախտող ագրեսիվ գործողությունների մասնակից է։ Կազմակերպությունը նաև իրավապահ մարմիններին խնդրեց արձագանքել իր պնդումներին։
Ռիժվաձեն խիստ քննադատության է ենթարկվել վրացական ընդդիմադիր խմբերի կողմից, ոմանք նրան անվանել են «համր» և մեղադրել «դավաճանական հայտարարություններ» անելու մեջ։
«Չի սիրահարվել Ուկրաինային»
Ռիժվաձեի շուրջ սկանդալը սրվեց, երբ Կիևի համալսարանը, ուր նա ուսանել էր, հայտարարեց, որ վերջինս համալսարանից դոկտորական կոչում չի ստացել։
«2015-ին նա ընդունվել է Կիևի Տարաս Շևչենկոյի անվան ազգային համալսարանի Միջազգային հարաբերությունների ինստիտուտի ասպիրանտուրան, իսկ 2017-ին նա հեռացվել է սեփական ցանկությամբ՝ ընտանեկան հանգամանքների պատճառով,- ասվում է հայտարարությունում,- Այսպիսով՝ ուսումնառության այս շրջանը չի ավարտվել գիտական աստիճան և որակավորում ստանալով, քանի որ ուսումն ընդհատվել է»։
«Շատ ենք ցավում, որ նա՝ որպես մեր նախկին ուսանող, չի սիրահարվել Ուկրաինային»,- ասվում էր համալսարանի տարածած հայտարարությունում։
Աջարիայի կառավարության պաշտոնական կայքում տեղադրված կենսագրությունում, սակայն, նշված է, որ Ռիժվաձեն դեռ շարունակում է ուսումը էներգետիկայի ոլորտում իրավաբանական գիտությունների թեկնածուի կոչում ստանալու նպատակով:
Համալսարանի հայտարարությունից հետո Ռիժվաձեն հակադարձեց՝ ասելով, թե վրացական ընդդիմադիր «Միացյալ ազգային շարժում» կուսակցությունն է կանգնած Կիևի համալսարանի հայտարարության հետևում:
«Քաղաքական նեղ շահեր սպասարկող մի շարք լրատվամիջոցներ, կեղծ հայրենասիրական քաղաքական ուժեր և «Միացյալ ազգային շարժման» կամակատար կազմակերպությունները […] ժամանակ գտան խեղաթյուրելու արտաքին քաղաքականության հարցերում իմ հայացքներն ու իմ ակադեմիական կենսագրությունը»,- գրել էր նա Facebook-ում։
Աջարիայի ղեկավարը նաև ասել է, որ «Փիրվելի» հեռուստաընկերության տված հարցը «հռետորական և սադրիչ» էր՝ պնդելով, որ Կիևում ուսանելու ժամանակ ինքն ստիպված է եղել կամավոր կերպով ակադեմիական արձակուրդ վերցնել իր թեկնածուական աշխատության խորհրդատուի մահվանից հետո և «ընտանեկան ու աշխատանքային հանգամանքների պատճառով»։
Ռիժվաձեի հետ վեճը վերջինն է Վրաստանի և Ուկրաինայի կառավարությունների միջև վեճերի շարքից, որն սկիզբ է առել Ուկրաինա ռուսական ներխուժմանը Վրաստանի արձագանքի հետևանքով։
Վրաստանում զայրույթի մեծ ալիք է տարածվել՝ կապված Ուկրաինա Ռուսաստանի ներխուժմանը Վրաստանի կառավարության արձագանքի հետ: Լուսանկարը՝ Մարիամ Նիկուրաձեի/OC Media։
Մարտի 1-ին Ուկրաինան հետ է կանչել Վրաստանում իր դեսպանին, ինչպես նախագահ Զելենսկին է նշել, Վրաստանի կառավարության «անբարոյական դիրքորոշման» համար:
Վրացի պաշտոնյաները բազմիցս փորձել են շեղել ներքին զայրույթը Ուկրաինայի հարցում իրենց դիրքորոշման վերաբերյալ՝ ասելով, թե «Միացյալ ազգային շարժում» կուսակցությունն ազդեցություն ունի Ուկրաինայի կառավարության որոշումների վրա:
