Թե՛ Արցախ մտնող միակ գազատարի վնասումն ու վերանորոգման աշխատանքների ձգձգումները, թե՛ վերջին օրերին խաղաղ բնակչության նկատմամբ ադրբեջանական կողմի ցուցաբերած ագրեսիվ վարքագիծը ունեն աշխարհաքաղաքական ենթատեքստ․ հայտարարել է Արցախի նախագահ Արայիկ Հարությունյանն այսօր Արցախի Անվտանգության խորհրդի ընդլայնված նիստին։
«Ադրբեջանը փորձում է օգտվել Ուկրաինայի շուրջ ստեղծված իրավիճակից ու միջազգային դերակատարների զբաղվածությունից: Պաշտոնական Բաքուն ակնհայտ սադրանքների է դիմում՝ նպատակ ունենալով հոգեբանական ահաբեկման ենթարկել Արցախի խաղաղ բնակչությանն ու այդ կերպ հայաթափել Արցախը: Հավաստիացնում եմ, որ Արցախի իշխանությունները բոլոր մակարդակներում աշխատանքներ են իրականացնում՝ կանխելու անվտանգային ու հումանիտար խնդիրների առաջացումը և շտկելու ստեղծված իրավիճակը: Ուստի, հորդորում եմ բոլորին պահպանել հանգստություն, զերծ մնալ իրավիճակի ավելորդ լարումից և անպատասխանատու գործողություններից»,- ասել է Արայիկ Հարությունյանը:
Այսօր հատուկ նիստ է հրավիրել նաև Արցախի խորհրդարանը և հայտարարություն ընդունել՝ ուղղված ԵԱՀԿ Մինսկի խմբին ու ՄԱԿ-ին։
Ադրբեջանը վերջին օրերին սրում է իրադրությունը՝ Արցախի սահմանամերձ գյուղերի նկատմամբ կիրառելով տարաեսակ սադրանքներ, նաև արձակելով կրակ ականանետերից։