Ուկրաինայի և Ռուսաստանի միջև բանակցություններում վերջնական փոխզիջումները կորոշվեն համաուկրաինական հանրաքվեով․ հայտարարել է Ուկրաինայի նախագահ Վլադիմիր Զելենսկին մարտի 21-ին մի քանի հեռուստաընկերությունների տված հարցազրույցում։
«Պուտինի հետ հենց հիմա հանդիպման դեպքում կոչեր ու պատմական ելույթներ չեն լինի»,- ասել է Զելենսկին Ռուսաստանի նախագահի հետ իր հնարավոր հանդիպման մասին․
«Ես նրա հետ շատ մանրամասն կքննարկեմ բոլոր հարցերը՝ տեղ չթողնելով մեր պետության ապագա ռիսկերի համար: Ես կփորձեմ անցնել այն ամենի միջով, ինչը շփոթեցնում և տհաճություն է պատճառում Ռուսաստանի Դաշնությանը, և կասեմ այն ամենը, ինչ մտածում է ուկրաինացի ժողովուրդը: Եթե ես հնարավորություն ունենամ, և եթե Ռուսաստանը ցանկություն ունենա, ապա մենք կանցնենք բոլոր հարցերով։ Կլուծե՞նք բոլորը։ Ո՛չ: Բայց կա հնարավորություն, որ մենք կարող ենք գոնե դադարեցնել պատերազմը: Առանց լուծման անհնար է»։
«Պուտինը ոչնչացնելով մեզ՝ ոչնչացնում է ինքն իրեն»,- ասել է Զելենսկին։ Նա նշել է, որ Ուկրաինայի և Ռուսաստանի միջև բանակցություններում վերջնական փոխզիջումները կորոշվեն համաուկրաինական հանրաքվեով, որը վերաբերում է անվտանգության երաշխիքներին, Դոնբասի և Ղրիմի «ժամանակավոր օկուպացված տարածքներին»։
Զելենսկին «օկուպացված Ղրիմը և Դոնբասը Ուկրաինայի վերահսկողության տակ վերադարձնելու հարցը բոլորի համար բարդ պատմություն» է անվանել։
«Եվ այնտեղ ինչ-որ ելք գտնելու համար պետք է անել այդ առաջին քայլը, որը ես ասացի՝ անվտանգության երաշխիքներ, պատերազմի ավարտ։ Որովհետև ամեն ինչ շատ թեժ է։ Երբ [խնդիրների] այդ բլոկը ավարտվի, դրանից հետո եկեք խոսենք։ [Ռուսաստանի նախագահի հետ առաջին հանդիպմանը] ես պատրաստ եմ այդ հարցերը բարձրացնել, դրանք արդիական են, մեզ համար կարևոր են՝ օկուպացված տարածքների վերաբերյալ։ Բայց ես վստահ եմ, որ այդ որոշումը չի կայացվի այդ հանդիպմանը։ Որովհետև.․․ անկեղծ ասած, մենք կխոսենք նաև սահմանադրական փոփոխությունների մասին՝ անվտանգության երաշխիքների հետ կապված»,- ասել է Զելենսկին։ Նա հավելել է, որ այդ պարագայում հարկավոր կլինեն օրենսդրության փոփոխություններ Ուկրաինայում: «Դա ամեն դեպքում կորոշի ոչ միայն նախագահը: Սա բավականին երկար ժամանակ է: Գործընթացը որոշվելու է թե՛ Ռադայի, թե՛ Ուկրաինայի ժողովրդի կողմից»,- ասել է Վլադիմիր Զելենսկին։
