Ռուսաստանը խորը մտահոգություն է հայտնել Լեռնային Ղարաբաղում լարվածության աճի կապակցությամբ, ասված է ՌԴ ԱԳՆ տարածած հայտարարության մեջ։
«Ռուսական խաղաղապահ զորակազմը երկու կողմերի հետ փոխգործակցությամբ անհրաժեշտ միջոցներ է ձեռնարկում տարածաշրջանում իրադրության ապաէսկալացման համար»,- ասված է հայտարարարությունում, փոխանցում է ՏԱՍՍ-ը։
Ռուսաստանը Լեռնային Ղարաբաղի հակամարտության «կողմերին կոչ է անում զսպվածություն ցուցաբերել և ապահովել Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների կատարումը»։
***
Մարտի 24-ին Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտել են շփման գիծը և մինչ օրս հակառակորդը դեռևս չի վերադարձել ելման դիրքեր։
Ադրբեջանական ստորաբաժանումները մարտի 25-ի գիշերը կրակ են բացել Արցախի պաշտպանության բանակի ստորաբաժանումների վրա՝ կիրառելով ինչպես տարբեր տրամաչափի հրաձգային զինատեսակներ, այնպես էլ հարվածային ԱԹՍ: Հակառակորդի գործողությունների հետևանքով հայկական կողմից զոհվել է ՊԲ երեք պայմանագրային զինծառայող, 15 հոգի վիրավորվել է։
Մարտի 26-ին ժամը 17:00-ի դրությամբ իրադրությունը Արցախի Փառուխ գյուղի հատվածում շարունակում է լարված մնալ։