Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել է, որ այլ երկրների տարածքում, այդ թվում՝ Ղարաբաղում՝ Ռուսաստանի շահերի ոլորտում, լրացուցիչ ճակատների բացումը Ուկրաինային մեծապես կօգնի պայքարել ռուսական հարձակման դեմ։ Այս մասին հաղորդում է ուկրաինական Pravda կայքը։
«Այն բանից հետո, երբ այսօր [մարտի 26] Լեռնային Ղարաբաղը իր տարածքում ռազմական դրություն մտցրեց, կարող եմ ասել՝ այնտեղ իսկապես իրադարձություննե՛ր են տեղի ունենում։ «Բայրաքթարները» ոչ միայն մեր տարածքում են արդուկում օրքերին [ֆանտաստիկ գրականությունում՝ մարդանման կենդանիներ – խմբ․]․ նրանք աշխատել են Լեռնային Ղարաբաղում։ Եվ այնտեղ Հայաստանն այսօր դիմում է Ռուսաստանի Դաշնությանը՝ զորքերով օգնելու համար։ Բայց նրանք այնտեղից զորքերը հանել ու անցյալ շաբաթ ուղարկել են մեր երկիր։ Մենք հետևում էինք շարժվող այդ շարասյուներին: Եվ մենք հասկանում ենք՝ օգնությունը, որը Ռուսաստանի Դաշնությունը խոստացել է Լեռնային Ղարաբաղին և Հայաստանին, դժվար թե այնտեղ հայտնվի»,- ասել է Դանիլովը։
«Թե ինչպես կավարտվի այս իրավիճակը, դեռ հայտնի չէ։ Բայց եթե Ռուսաստանի Դաշնության համար բացվեն երկրորդ ճակատներ, որը նա արհեստականորեն ստեղծեց սեփական գործողություններով իր կարճ պատմության ընթացքում, ապա դրանք մեզ որակապես շատ կօգնեն»,- հայտարարել է Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը։
***
Օրեր առաջ Ուկրաինայի Գերագույն ռադան իր Թվիթերի էջում գրառում էր արել, որ իբր Ղարաբաղից ռուսական զորքեր են ուղարկվում Ուկրաինա։ Ավելի ուշ թվիթը հեռացվեց։
