Կրեմլն անհրաժեշտ է համարում, որ բոլոր կողմերը կատարեն Լեռնային Ղարաբաղի վերաբերյալ ձեռք բերված պայմանավորվածությունները։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։
Ինչ վերաբերում է տարածաշրջանում լարվածության աճի ֆոնին խաղաղապահների լրացուցիչ զորակազմ ուղարկելու հնարավորությանը, Պեսկովը նշել է, որ այդ հարցը պետք է տալ Ռուսաստանի պաշտպանության նախարարությանը։
«Այդ հարցը պետք է տալ մեր զինվորականներին։ Նրանք շփման մեջ են ադրբեջանական և հայկական կողմերի հետ։ Այժմ գլխավորն այն է, որ բոլոր կողմերը շարունակեն պահպանել համապատասխան պայմանավորվածությունները»,- ասել է նա։
Մարտի 24-ին Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտել են շփման գիծը և մինչ օրս հակառակորդը դեռևս չի վերադարձել ելման դիրքեր։
Ադրբեջանական ստորաբաժանումները մարտի 25-ի գիշերը կրակ են բացել Արցախի պաշտպանության բանակի ստորաբաժանումների վրա՝ կիրառելով ինչպես տարբեր տրամաչափի հրաձգային զինատեսակներ, այնպես էլ հարվածային ԱԹՍ: Հակառակորդի գործողությունների հետևանքով հայկական կողմից զոհվել է ՊԲ 3 պայմանագրային զինծառայող, 15 հոգի վիրավորվել է։
Մարտի 27-ին Ռուսաստանի պաշտպանության նախարարությունը հայտնեց, որ բանակցությունների արդյունքում ադրբեջանական ուժերը հեռացել են Փառուխից։ Բաքուն, սակայն, արձագանքեց, որ «Ռուսաստանի ՊՆ հաղորդագրությունը իրականությանը չի համապատասխանում»։ Հայաստանի ԱԳՆ-ն ևս արձանագրում է, որ ադրբեջանական զորքերի ներխուժումը ԼՂ-ում խաղաղապահ զորախմբի պատասխանատվության գոտի շարունակվում է։