Ուկրաինայում հայերի միությունից ահազանգել են, որ Երևանում սկսել են ապամոնտաժել միության ջանքերով տեղադրված՝ էլեկտրամոբիլների լիցքավորման կայանները։ Միության ներկայացուցիչ Հովակիմ Հարությունյանը, ֆեյսբուքյան իր էջում տեղադրելով տեսանյութեր, կարծիք է հայտնել, թե քաղաքային իշխանությունը նման քայլի է դիմել միության՝ «ուկրաինամետ դիրքորոշման» համար։
«Մեր՝ ուկրաինամետ դիրքորոշման համար Երևանում ապամոնտաժում են էլեկտրամոբիլների համար նախատեսված լիցքավորման կայանները, որոնք մենք Ուկրաինայի հայերի միության կողմից տեղադրել էինք զբոսաշրջության և ներդրումային ծրագրի շրջանակում։ Հարյուրավոր էլեկտրամոբիլներ մեկ տարվա ընթացքում ներմուծվել են Հայաստան միայն այն բանի համար, որ քաղաքում հայտնվել էին լիցքավորման կայաններ․ ներկայում դրանք ապամոնտաժում են»,- գրել է Հովակիմյանը։
ՍիվիլՆեթը պարզաբանում ստանալու նպատակով դիմեց Երևանի քաղաքապետարան, որտեղից հայտնեցին՝ «լիցքավորման կայաններ տեղադրելու թույլտվություն չի եղել»։
«Քաղաքացի Հայկ Հարությունյանը Էլեկտրամոբիլների լիցքավորման կայաններ տեղադրելու թույլտվություն չի ունեցել: Վերջինիս կողմից, ըստ էության, դրսևորվել է ինքնիրավչություն: Նշված հասցեներում լիցքավորման կայանները տեղադրվել են կամայական սկզբունքով, տվյալ քաղաքացու անձնական նախաձեռնությամբ՝ առանց հաշվի առնելու ընթացակարգով սահմանված քաղաքաշինական պահանջների և այլ չափորոշիչների ապահովման անհրաժեշտությունը»,- նշեցին քաղաքապետարանից։
Ըստ պաշտոնական աղբյուրի՝ քաղաքացին դիմել է աշխատակազմի ճարտարապետության և քաղաքաշինության վարչություն, որտեղից վերջինիս պատասխանել են, որ գործունեության տվյալ տեսակի իրականացումը ենթադրում է որոշակի ժամանակահատված՝ խնդիրն ուսումնասիրելու, կայանների տեղակայման վայրերի նպատակահարմարությունը մի շարք նեղ մասնագիտական չափորոշիչներով քննարկելու համար:
«Ըստ ամենայնի ՝ քաղաքացին անձնական դրդապատճառներով հաշվի չի առել այս հանգամանքները, և կայանները տեղադրել է ընդհանուր օգտագործման տարածքներում՝ որոշ դեպքերում բետոնապատելով կանաչ գոտին, առանձին դեպքերում էլ՝ երթևեկելի գոտիների կարմիր գծերում, որոնք նույնպես համարվում են ընդհանուր օգտագործման տարածքներ (կայանատեղիներ)»,- հայտնեցին քաղաքապետարանից։
Ելնելով վերը նշվածից՝ Երևանի քաղաքապետարանը ապամոնտաժել է լիցքավորման կայանները:
2019-2021 թվականներին Հայաստան է ներմուծվել ավելի քան 5 200 էլեկտրական շարժիչով տրանսպորտային միջոց (2018-ին ներմուծվել է ընդամենը 12 էլեկտրամոբիլ):
Ուկրաինայի հայերի միությունը ստեղծվել է 2001-ին։ Միությունը դարձել Է Ուկրաինայի՝ Եվրոպական միության թափանցիկության ռեեստրում ընդգրկված առաջին հասարակական կազմակերպությունը: Բրյուսելում գործում է Միության ներկայացուցչությունը:
Գևորգ Թոսունյան
