Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևն այսօր հեռախոսազրույցներ են ունեցել Ռուսաստանի նախագահ Վլադիմիր Պուտինի հետ։
Հայաստանի վարչապետի գրասենյակի հաղորդագրության համաձայն՝ Նիկոլ Փաշինյանը ՌԴ նախագահին տեղեկացրել է ապրիլի 6-ին Եվրոպական խորհրդի նախագահ Շառլ Միշելի միջնորդությամբ Ադրբեջանի նախագահ Իլհամ Ալիևի հետ ունեցած հանդիպման արդյունքների մասին:
«Զրուցակիցները կարևորել են Ադրբեջանի հետ խաղաղության պայմանագրի ստորագրման և սահմանազատման աշխատանքների մեկնարկի մասին պայմանավորվածությունները: Ռուսաստանի Դաշնության նախագահը պատրաստակամություն է հայտնել լիարժեք աջակցել նշված գործընթացներին:
Անդրադարձ է կատարվել Լեռնային Ղարաբաղում ՌԴ խաղաղապահ զորախմբի պատասխանատվության գոտի ադրբեջանական ստորաբաժանումների ներխուժմանը: Վարչապետ Փաշինյանն արտահայտել է հայկական կողմի ակնկալիքը, որ ռուս խաղաղապահները կոնկրետ միջոցներ ձեռնարկեն ներխուժած ադրբեջանական ստորաբաժանումների դուրսբերումն ապահովելու համար»,- նշվում է հաղորդագրությունում:
Ինչպես հաղորդում է ՌԴ նախագահի կայքը, այսօր Պուտինը հեռախոսազրույց է ունեցել նաև Ադրբեջանի նախագահ Իլհամ Ալիևի հետ։
«Քննարկվել են ապրիլի 6-ին Բրյուսելում Իլհամ Ալիևի և Հայաստանի Հանրապետության վարչապետ Նիկոլ Փաշինյանի միջև կայացած բանակցությունների արդյունքները։ Միևնույն ժամանակ ընդգծվել է Ադրբեջանի, Հայաստանի և Ռուսաստանի ղեկավարների միջև Լեռնային Ղարաբաղի վերաբերյալ 2020-ի նոյեմբերի 9-ի, հունվարի 11-ի և 2021-ի նոյեմբերի 26-ի պայմանավորվածությունների լիարժեք իրականացման, ինչպես նաև 2021-ին տարածաշրջանում տնտեսական և տրանսպորտային կապերի զարգացման եռակողմ աշխատանքային խմբի ակտիվացումը: Անդրադարձ է կատարվել ադրբեջանա-հայկական սահմանի սահմանազատման և Ադրբեջանի ու Հայաստանի միջև խաղաղության պայմանագրի նախապատրաստման աշխատանքների մեկնարկի հարցերին։
Հաստատվել է երկկողմ հարաբերությունների ընթացիկ օրակարգում սերտ համագործակցությունը շարունակելու փոխադարձ տրամադրվածությունը»,- նշվում է Կրեմլի հաղորդագրությունում։
ՌԴ նախագահի մամուլի ծառայության համաձայն՝ երկու զանգն էլ տեղի է ունեցել հայկական և ադրբեջանական կողմերի նախաձեռնությամբ։
