11:50
Ոստիկանությունը տեղեկացնում է, որ մայրաքաղաքի բոլոր ճանապարհները բաց են ու երթևեկելի:
«Այսօր առավոտից մայրաքաղաքի երեք տասնյակ խաչմերուկներ փակվել էին քաղաքացիների կողմից: Ոստիկանության ծառայողներն արագորեն վերականգնել են երթևեկությունը: Ներկայումս մայրաքաղաքում բոլոր ճանապարհները բաց են ու երթևեկելի»,- ասված է հայտարարությունում։
***
11:25
Այսօր՝ մայիսի 2-ին, ժամը 18:00-ին Ֆրանսիայի հրապարակում տեղի կունենա «Դիմադրության» շարժման հանրահավաքը։
***
10:50
Ոստիկանության լրատվական բաժնից ՍիվիլՆեթին հայտնեցին, որ մայրաքաղաքի տարբեր հատվածներից կան 125 բերման ենթարկվածներ:
***
«Դիմադրության» շարժման ցուցարարներն այսօր առավոտվանից փակել են Երևանի մի շարք կենտրոնական փողոցներ։
Վարչապետ Նիկոլ Փաշինյանի հրաժարականի պահանջով անհնազանդության գործողություններին մասնակցում են ինչպես «Հայաստան» և «Պատիվ ունեմ» խմբակցությունների ներկայացուցիչներ, այնպես էլ այլ խմբեր ու քաղաքացիներ։
Ըստ «Հայաստան» խմբակցությունից դաշնակցական պատգամավոր, ԱԺ փոխնախագահ Իշխան Սաղաթելյանի՝ ժամը 10:00-ի դրությամբ պարալիզացված են հետևյալ փողոցներն ու խաչմերուկները․
Պռոշյան-Հրազդանի կիրճ,
Բաղրամյան-Պռոշյան,
Տերյան
Աբովյան(Պլանի գլուխ)
Հերացի
Կորյուն-Հերացի-Խանջյան,
Սայաթ-Նովա-Չարենց,
Երվադ Քոչար-Վարդանանց,
Տիգրա Մեծ-Երվանդ Քոչար,
Արշակունյաց-Ագաթանգեղոս-Գրիգոր Լուսավորիչ,
Հաղթանակի կամուրջ:
Ցուցարարները փողոցներն ու խաչմերուկները փակում են օգտագործելով նաև աղբամաններ և նստարաններ։
Մայիսի 1-ին Երևանի Ֆրանսիայի հրապարակում տեղի է ունեցել ընդդիմության հանրահավաքը։ Վարչապետ Նիկոլ Փաշինյանի հրաժարականը պահանջող ընդդիմադիրներն իրենց պայքարը կոչել են «Դիմադրության շարժում»։ Նրանք վրաններ են տեղադրել Ֆրանսիայի հրապարակում և հայտարարել են անժամկետ նստացույցի մասին։
«Հայաստան» խմբակցությունից դաշնակցական պատգամավոր, ԱԺ փոխնախագահ Իշխան Սաղաթելյանը հայտարարել էր, որ մայիսի 2-ի ժամը 8։30-ից սկսում են անհնազանդության գործողություններ իրականացնել․ «Վաղը հանրապետության բազմաթիվ փողոցներ, մայրուղիներ լինելու են փակ։ Կենտրոն համայնքում որևէ մեքենայի շարժ չպետք է լինի»,- ասել էր նա։
