Թուրքիայի ավիացիոն իշխանությունները FLYONE ARMENIA ընկերությանը չեն տրամադրել Թուրքիայի օդային տարածքով դեպի եվրոպական երկրներ չվերթերի իրականացման (overflight) հնարավորություն։ Այս մասին հայտնում են FLYONE ARMENIA ընկերությունից։
Ստեղծված իրավիճակի արդյունքում՝ ընկերությունը ստիպված է մինչև հունիսի 10-ը չեղարկել Երևան- Լիոն- Երևան և Երևան- Փարիզ- Երևան ուղղություններով չվերթերը․ «Նշենք, որ Երևան- Ստամբուլ- Երևան երթուղով չվերթերը իրականացվում են համաձայն չվացուցակի»։
Ընկերությունը հայցում է ուղևորների ներողամտությունը պատճառված անհարմարությունների հետ կապված և ուղևորներին առաջարկում է հետևյալ այլընտրանքները:
«Թռիչքի ամսաթվի փոփոխություն;
Credit Shell Գումարի 110%–ի չափով հետ վերադարձ ձեր FLYONE անձնական հաշիվ․ միայն տոմսեր, գնված կայքում կամ հավելվածում;
Չեղարկված թռիչքի՝ տոմսի, գումարի ամբողջական վերադարձ։
Եթե տոմսը գնվել է տուրիստական գործակալությունից, ավիաընկերությունը խնդրում է կապ հաստատել գործակալության հետ՝ ընտրելու ներկայացված այլընտրանքերից մեկը»,- ասված է ավիաընկերության հայտարարությունում։
Երկար դադարից հետո Երևան-Ստամբուլ-Երևան թռիչքները 2022-ի փետրվարին վերսկսեցին՝ որպես Հայաստան-Թուրքիա հարաբերությունների կարգավորման գործընթացին նպաստող քայլ։ Հայկական Fly One Armenia ավիաընկերությունը Երևան-Ստամբուլ-Երևան թռիչքների թույլտվությունը ստացել է 2021-ի դեկտեմբերին, իսկ թուրքական Pegasus-ը՝ 2022-ի հունվարին։
