2022-ի միլիարդատերերի վարկանիշը՝ ըստ Forbes-ի. ցանկում ութ հայ կա 

Լուսանկարը՝ Forbes-ի

Ամերիկյան Forbes հեղինակավոր հանդեսը հրապարակել է 2022-ի միլիարդատերերի համաշխարհային վարկանիշը։

Վարկանիշում ընդհանուր առմամբ ընդգրկվել է 2 668 գործարար, որոնց կարողությունը գերազանցում է 1 մլրդ դոլարը: Նրանց ընդհանուր կարողությունը 12,7 տրիլիոն դոլար է՝ 2021-ի համեմատ՝ 400 մլրդ դոլարով պակաս՝ պատերազմի, համաճարակի և «ծույլ» շուկաների պատճառով։ Չնայած, ավելի քան 1 000 միլիարդատեր ավելի հարուստ է դարձել, քան մեկ տարի առաջ։

Աշխարհի ամենահարուստ մարդը Tesla, SpaceX ընկերությունների հիմնադիր Իլոն Մասկն է։ Forbes-ը նրա կարողությունը գնահատել է 233,7 մլրդ դոլար։ Նախորդ տարվա համեմատ նրա կարողությունն աճել է 9,1 մլրդ դոլարով։

Երկրորդ հորիզոնականում ֆրանսիացի գործարար, Louis Vuitton Moët Hennessy ընկերության նախագահ Բեռնար Առնոն է՝ 150,8 մլրդ դոլար կարողությամբ։ Լավագույն եռյակը եզրափակում է Amazon-ի հիմնադիր Ջեֆ Բեզոսը՝ 142 մլրդ։ Երկար տարիներ աշխարհի ամենահարուստ մարդ ճանաչված Բիլ Գեյթսը, որը Microsoft-ի հիմնադիրն է, այս տարի չորրորդն է՝ 124,8 մլրդ դոլարով։

2 668 միլիարդատերերից 735-ը Միացյալ Նահանգներից են, 607-ը՝ Չինաստանից։ Ցանկում ներկայացված է ազգությամբ 8 հայ գործարար։

Աշխարհի ամենահարուստ հայը ռուսաստանաբնակ գործարար, «Տաշիր» խմբի սեփականատեր Սամվել Կարապետյանն է, որի կարողությունը գնահատվում է 3,6 մլրդ։ Նա զբաղեցնում միլիարդատերերի վարկանիշի 806-րդ հորիզոնականը:

«Մագնիտ» առևտրային ցանցի հիմնադիր Սերգեյ Գալիցկին (Հարությունյան) Forbes-ի վարկանիշում 880-րդն է` 3,3 մլրդ դոլարով, իսկ Badoo առցանց ծանոթությունների ծառայության հիմնադիր Անդրեյ Անդրեևը (Օհանջանյանց) 1 461-րդն է՝ 2 մլրդ կարողությամբ։

Flagship Pioneering և Moderna Therapeutics ընկերությունների հիմնադիր և գործադիր տնօրեն Նուբար Աֆեյանի կարողությունը նույնպես 2 մլրդ է գնահատվում, նա 1 473-րդ հորիզոնականում է։

Քիմ Քարդաշյանը Forbes-ի միլիարդատերերի ցուցակի 1 595-րդն է՝ 1,8 մլրդ դոլարով, արգենտինահայ Էդուարդո Էռնեկյանը՝ 1 955-րդը՝ 1,5 մլրդ կարողությամբ։ Գործարար, ֆինանսիստ Ռուբեն Վարդանյանը 1,2 մլրդ դոլարով 2 204-րդն է։ Հեռահաղորդակցության ոլորտում գործունեություն ծավալող Ալբերտ Ավդոլյանը 2 281-րդ հորիզոնականում է՝ կրկին 1,2 մլրդ դոլարով։

Միլիարդատերերի վարկանիշին ամբողջությամբ կարող եք ծանոթանալ այստեղ։