Հովհաննես Նազարեթյան #CivilNetCheck
Ավելի քան չորս տարի առաջ հայտարարված Լճաշեն-Սևանի թերակղզի ճեմուղու նախագիծը դեռ քննարկման փուլում է։
Բնապահպանության նախարարության՝ դեռ 2018-ի սկզբին մշակած «Սևան» ազգային պարկի 2018-2023թթ. միջոցառումների ծրագրի մեջ ընդգրկվել էր Լճաշեն-Սևան հատվածը ներառող ծովափնյա ճեմուղու կառուցումը։ Մեկ տարի անց՝ 2019-ի հունվարին, Քաղաքաշինության կոմիտեն հայտարարել էր, որ կոմիտեի նախագահ Ավետիք Էլոյանի նախաձեռնությամբ նոր թափ է հաղորդվել նախորդ տարի մեկնարկած ծրագրին:
2019-ի նոյեմբերին Ազգային ժողովի «Իմ քայլը» խմբակցության պատգամավոր Հայկ Սարգսյանը հայտարարեց Լճաշենից Սևանավանք ձգվող ճեմուղու նախագծման մասին։ «Առաջիկայում ունենալու ենք հմայիչ, բարեկարգ թերակղզի և նմանը չունեցող 10 կմ երկարությամբ ճեմուղի, որը կդառնա մեր երկրի այցեքարտերից մեկը»,- գրել էր նա։
Ըստ Սարգսյանի՝ ծովափնյա հետիոտն ճեմուղի պետք է սկսվի Մ-4 և Մ-10 մայրուղիների հատման կետից և ավարտվի Սևանավանքի մուտքի մոտ։ Ճեմուղու երկայնքով նախատեսվում է ստեղծել քոթեջներ, հյուրանոցներ, առևտրի, սպասարկման, սննդի օբյեկտներ, զբոսայգիներ, իսկ ճեմուղուն զուգահեռ նախատեսվում է ուենանալ հեծանվուղի։
Այս տարվա մարտի 4-ին էլ փոխվարչապետ Համբարձում Մաթևոսյանի գլխավորությամբ՝ պետական մարմինների ղեկավարների ու ներկայացուցիչների մասնակցությամբ, տեղի ունեցավ խորհրդակցություն՝ ճեմուղու նախագծի և Սևանի հանրային լողափերի վերաբերյալ:
Դեռ քննարկվում է
Ճարտարապետ Ռազմիկ Բաբայանի «Արխիտոն» ընկերության հետ 2019-ի դեկտեմբերին Քաղաքաշինության կոմիտեն կնքել էր Լճաշեն-Սևանի թերակղզի հատվածի գոտևորման նախագծի և քաղաքաշինական կանոնադրության մշակման աշխատանքների պայմանագիր, որն արժեցել է 43 մլն դրամ։ 2020-ի դեկտեմբերին կնքված երկրորդ համաձայնագրով կատարման ժամկետ էր սահմանվել 2021-ի մայիսի 15-ը։
Քաղաքաշինության կոմիտեից #CivilNetCheck-ի հարցմանն ի պատասխան հայտնեցին, որ «Արխիտոնի» հետ կնքված պայմանագրով նախատեսված գոտևորման նախագծի և քաղաքաշինական կանոնադրության մշակման աշխատանքներն իրականացվել են սահմանված կարգով հաստատված նախագծման առաջադրանքի դրույթներին, ծավալին և փուլերին համապատասխան և ներկայացվել են կոմիտե։ Վերջինս պետք է այն ներկայացնի ծրագրային փաստաթղթերի մշակման աշխատանքները համակարգող միջգերատեսչական հանձնաժողովի համաձայնեցմանը։
Ըստ Քաղշինկոմիտեի պատասխանի՝ Լճաշեն-Սևանի թերակղզի հատվածի գոտևորման նախագծի և քաղաքաշինական կանոնադրության մշակման աշխատանքները գտնվում են ավարտական փուլում: Գեղարքունիքի մարզպետարանից #CivilNetCheck-ին հայտնեցին, որ միջգերատեսչական հանձնաժողովի առաջարկությունների հիման վրա ներկայում նախագիծը լրամշակվում է։
Աշխատանքներն ամբողջությամբ ավարտելու համար նախագիծը պետք է անցնի նաև հանրային քննարկումներ:
Ճեմուղու ծրագրի շուրջ առաջին հանրային քննարկումը եղել է 2020-ի նոյեմբերին՝ Սևանի քաղաքապետարանում։ Այդ հատվածում հողատարածքներ վարձակալած անձինք դեմ էին արտահայտվել ծրագրին, մասնավորապես, փոխհատուցմանը և հանգստի գոտիների ապամոնտաժմանը։ Մեկ այլ հանրային քննարկում տեղի է ունեցել այս տարվա մարտին։ «Շրջակա միջավայրի վրա ազդեցության փորձաքննական կենտրոն» ՊՈԱԿ-ի տնօրենի ժամանակավոր պաշտոնակատար Խաչիկ Մարտիրոսյանը ասել էր, որ մասնակիցները, որոնք հիմնականում տնտեսվարողներ էին, մեծամասնությամբ դեմ էին ծրագրին։
Աշխատանքային խումբը
2020-ի հուլիսի 16-ին վարչապետի որոշմամբ ճեմուղուն առնչվող հարցերով զբաղվող աշխատանքային խումբ էր ստեղծվել։ Այն պետք է մինչև 2020-ի օգոստոսի 17-ը ներկայացներ ճեմուղու հատվածում հողամասերի և շինությունների նկատմամբ իրավատեր հանդիսացող սուբյեկտների հետ գույքերի գնահատման և հնարավոր փոխհատուցման և ապօրինի շինությունների ապամոնտաժման հարցերը քննարկելու արդյունքները։
#CivilNetCheck-ը վարչապետի աշխատակազմից փորձեց պարզել, թե արդյոք աշխատանքային խումբն ավարտել է աշխատանքը և ներկայացրել արդյունքները։ Հարցումը վերահասցեագրվեց Գեղարքունիքի մարզպետարան, որտեղից տեղեկացրին, որ աշխատանքային խմբի աշխատանքներն ընթացքի մեջ են։
Փաստացի, դեռ 2019-ին մեկնարկած ծրագիրը, որը պետք է ավարտվեր «առաջիկայում», տեղում դոփում է և առաջ չի շարժվում հանձնաժողովների քննարկումների փուլից։
