Հայկ Հովհաննիսյան, #CivilNetCheck
Հանրապետական սփռում ունեցող, «Բարգավաճ Հայաստան» կուսակցության առաջնորդ Գագիկ Ծառուկյանին պատկանող «Կենտրոն» հեռուստաընկերությունը հուլիսի 16-ին հրապարակել է «Օգտատերերը հեգնանքով են արձագանքել Հատիսի գագաթին տեղի ունեցած բողոքի ակցիային» վերնագրով հատուկ ռեպորտաժ։
Ռեպորտաժում մեջբերվում են ֆեյսբուքյան իբրև շարքային օգտատերերի գրառումներ, որոնք ծաղրում և վիրավորական արտահայտություններ են հնչեցվում Հատիս լեռան գագաթին Հիսուսի արձանի տեղադրման «ապօրինությունների» դեմ բողոքի ակցիայի մասնակիցների մասին։
ՍիվիլՆեթի փաստերի ստուգման թիմը՝ #CivilNetCheck-ը, պարզել է, որ ռեպորտաժում մեջբերված որպես իրական, անկախ օգտատերեր ներկայացվող ֆեյսբուքյան էջերը կեղծ են և փոխկապակցված են «Բարգավաճ Հայաստան» կուսակցության հետ։
Ֆեյքերը գրում են, «Կենտրոն»-ը՝ տարածում
Ռեպորտաժում ցուցարարներին ծաղրող օգտահաշիվների վերջին բոլոր հրապարակումները վերաբերում են բացառապես Հիսուսի արձանի տեղադրմանը կամ դրա դեմ բողոքող ցուցարարներին։
Ուսումնասիրելով օգտահաշիվների ամբողջ ակտիվությունը, պարզ է դառնում նրանց ամբողջ գործունեությունն է նվիրված «Բարգավաճ Հայաստանին» և Գագիկ Ծառուկյանին։ Այսպես, 2020-ին նրանք գրառումներ են արել Գագիկ Ծառուկյանի կալանավորման, իսկ 2021-ին Ազգային Ժողովի և ՏԻՄ ընտրություններին «Բարգավաճ Հայաստան» կուսակցությանը սատարելու վերաբերյալ։
Օգտահաշիվների կեղծ լինելը ապացուցվում է նաև օտարազգի այլ անձանցից «գողացված» լուսանկարներով։ Օրինակ՝ ռեպորտաժում մեջբերված Gurgen Sargsyan օգտատիրոջ լուսանկարում պատկերված անձը իրականում ռուսաստանբնակ Тенгиз Цулая-ն է։ Սա պարզում ենք՝ կեղծ օգտահաշվի լուսանկարը որոնողական համակարգում փնտրելով։
Երկու այլ մեջբերվող հեղինակները ևս կեղծ են։ Kara Kirakosyan-ի լուսանկարում իրականում վրացուհի Николь Датунашвили-ն է, իսկ Nina Margaryan անվամբ ֆեյքի նկարները պատկանում են վրացուհի Nino Xalibegashvil-ին։
Այս և նմանատիպ ֆեյքեր իրենց գործունեությունն են ծավալում Գագիկ Ծառուկյանի ֆեյսբուքյան պաշտոնական էջում և լրատվականների հրապարակումների մեկնաբանություններում։ Օրինակ՝ ՍիվիլՆեթի՝ Ծառուկյանին վերաբերող հրապարակման մեկնաբանություններում նրան սատարող օգտահաշիվներն արդարացնում կամ գովաբանում են Ծառուկյանին։
Ֆեյքերի «առաջնորդը»
Ռեպորտաժում ցուցարաներին քննադատող չորրորդ և միակ իրական օգտատերը «Բարգավաճ Հայաստան» կուսակցության ուսանողական խորհրդի՝ փաստացի երիտթևի ղեկավար Լիաննա Մանուկյանն է, որի ընկերների ցանկում են վերոնշված երկու ֆեյքերը։
Փաստերի ստուգման հարթակը 2018-ի դեկտեմբերին բացահայտել էր, որ Լիաննա Մանուկյանը նախընտրական շրջանում ղեկավարել է «Բարգավաճ Հայաստանի» օգտին քարոզչություն իրականացնող շուրջ 400 օգտահաշիվներից բաղկացած «ֆեյքերի բանակ»։ Fip.am-ը նաև պարզել էր, որ ֆեյքեր աշխատացնելու համար Մանուկյանի գլխավորած կազմակերպությունը վճարում էր ամսական շուրջ 100 000 դրամ։
Մանուկյանը հրահանգում է մեկնաբանել իր և Ծառուկյանի հրապարակումները. 2020-ի դեկտեմբեր․ աղբյուր՝ Fip.am
Ծառուկյանին և նրա կուսակցությանը ծառայող ավելի քան հարյուր ակտիվ ֆեյքեր ներկայում ակտիվ գործունեություն են ծավալում նաև Գագիկ Ծառուկյանի պաշտոնական էջում՝ հավանելով նրա հրապարակումները և դրանց տակ Լիաննա Մանուկյանի մեկնաբանությունները՝ ստեղծելով հանրային մեծ աջակցության պատրանք։
Այսպիսով, «Կենտրոն» հեռուստաընկերությունն իր ռեպորտաժում մեջբերել է օգտատերեր, որոնք իրականում ԲՀԿ-ի հետ փոխկապակցված կեղծ օգտահաշիվներ են։
Տես՝ ԿԳՄՍ-ն դիմել է ոստիկանություն՝ Հատիսում շինաշխատանքների հետ կապված
