Աբխազիայի օրենսդիրները պատրաստվում են քննարկել Պիցունդայում (Բիչվինտա) խորհրդային ժամանակաշրջանի պետական ամառանոցը (դաչա) Ռուսաստանին փոխանցելու հարցը, ինչը հարուցել է քաղաքական գործիչների և բնակիչների քննադատությունն ու անհանգստությունը:
1995-ին Աբխազիայի առաջին նախագահ Վլադիսլավ Արձինբան համաձայնել էր ամառանոցը 49 տարով վարձակալության տալ Ռուսաստանի Դաշնային պահպանության ծառայությանը։ 27 տարի անց՝ 2022-ի հունվարին, վարձակալությունը երկարաձգվել է:
Երկարաձգման պայմանագրի մանրամասները հրապարակվեցին միայն այն ժամանակ, երբ փաստաթուղթը քննարկման դրվեց Աբխազիայի խորհրդարանի Միջազգային հարաբերությունների հանձնաժողովի օրակարգում։ Հանձնաժողովի անդամները հավանություն են տվել փաստաթղթին և այն ներկայացրել խորհրդարանին վավերացման:
Համաձայնագրի շուրջ մտահոգությունները զսպելու նպատակով Աբխազիայի նախագահ Ասլան Բժանիան շրջել է մի քանի քաղաքներում՝ խոսելու փոխանցման մասին։ Նա ընդգծել է, որ Աբխազիայի անվտանգությունը «ուղղակիորեն կախված է» դրանից։ Նա նաև ասել է, որ կառավարությունը զիջելու է միայն ամառանոցը և դրա հարակից շենքերը, այլ ոչ թե այն հողը, որի վրա դրանք կառուցվել են։
Մի քանի նախկին պատգամավոր հրապարակայնորեն դատապարտել է համաձայնագիրը և կոչ արել խորհրդարանին ու Բժանիային չվավերացնել այն, քանի որ «հակասում է Աբխազիայի և նրա ինքնիշխանության շահերին»։
Սուխումի Քաղաքացիական հասարակության խումբ կազմակերպության մարդասիրական ծրագրերի կենտրոնի իրավաբան Սաիդ Գեզերդաան պնդում է, որ համաձայնագիրը հակասում է Սահմանադրությանը:
Հուլիսի 20-ին արտաքին գործերի նախարարության հանրային խորհուրդը՝ Աբխազիայի լրագրողների, քաղաքական գործիչների և վետերանների հավաքախումբ, նույնպես որոշել է իրավական քննություն անցկացնել համաձայնագրի վերաբերյալ։
Խորհրդի նիստում Աբխազիայի լրագրողների միության նախագահ Ռուսլան Խաշիգը պնդել է, որ Ռուսաստանի հետ ցանկացած միջպետական համաձայնագիր, համենայնդեպս նրանք, որոնք ստորագրվել են մինչև Մոսկվայի կողմից Աբխազիայի ճանաչումը, պետք է վերանայման ենթակա լինեն, քանի որ դրանք միջազգային համաձայնագրեր չէին երկու փոխադարձաբար ճանաչված պետությունների միջև։
Համաձայնագրի շուրջ արտաքին գործերի նախարար Ինալ Արձինբան փակ հանդիպում է ունեցել նաև Աբխազիայում Ռուսաստանի դեսպան Միխայիլ Շուրգալինի հետ։
Հանդիպմանը մասնակցած ընդդիմադիր գործիչ Վիանոր Աշբան պնդում է, որ ո՛չ Աբխազիայի անվտանգությունը, ո՛չ էլ Ռուսաստանի ֆինանսական աջակցությունը կախված չեն համաձայնագրից:
Մոտ 2 քկմ տարածք ունեցող Պիցունդայի դաչան Աբխազիայում խորհրդային ժամանակաշրջանի երեք պետական ամառային նստավայրերից մեկն է: Եթե մյուս երկուսը ներկայում բաց են հանրության համար, Պիցունդայում գտնվող այս մեկը փակ է և ցանկապատված: