Արտակարգ իրավիճակների նախարար Արմեն Փամբուխչյանը լրագրողների հետ զրույցում հայտնել է, որ Սուրմալու առևտրի կենտրոնում պայթյունի հետևանքով զոհվել է 40-45 տարեկան տղամարդ։
ԱԻՆ-ի նախնական տվյալների համաձայն՝ տեղի է ունեցել պայթյուն՝ հրդեհի բռնկմամբ․ կա մեկ զոհ և երեսունչորս տուժած։
«Մինչ այս երկու կնոջ՝ քույրեր էին, կարողացանք բավականին ծանր վիճակում դուրս բերել, տեղափոխել հիվանդանոց»,- հայտնել է նախարարը։
Լրագրողները նրան խնդրեցին անդրադառնալ նաև հրավառության վարկածին, սակայն Փամբուխչյանը չհաստատեց այն՝ նշելով, որ նման խոսակցություններ կան։
ԱԻՆ-ից նաև տեղեկացրել են, որ հրդեհաշիջման աշխատանքներն իրականացվում են չորս տեղամասով․ աշխատանքներին ներգրավված են Երևանի քաղաքապետարանի տասնչորս ջրատար, ութ բեռնատար և երեք տրակտոր։ Հրդեհաշիջման աշխատանքներին մասնակցում են 50 փրկարար և 155 հրշեջ-փրկարար։
Պայթյունի հետևանքով տուժածները տեղափոխվել են «Արմենիա» ՀԲԿ, «Շենգավիթ», «Սուրբ Աստվածամայր» և «էրեբունի» ԲԿ-ներ։
